لاہور(نیوزڈیسک) لاہور الیکٹرک سپلائی کمپنی (لیسکو) نے بجلی چوروں کیخلاف کارروائی کیلئے اپنی پولیس کے قیام اور مجسٹریٹ کے اختیارات مانگ لئے۔چیئرمین لیسکو بورڈ حافظ نعمان کے مطابق انہوں نے وفاقی حکومت سےدرخواست میں تجاویز پیش کردی ہے جس میں پنجاب حکومت سےلیسکو کیلئے تھانے مختص کرانے، لیسکو کی اپنی پولیس اور مجسٹریٹ کے اختیارات دینےکی تجویز بھی دی ہے، لیسکو نے وفاقی حکومت کو سمری بھجوا دی ۔ حافظ نعمان کاکہنا تھا کہ بجلی چوروں کے خلاف 70 ہزار سے زائدکیسز کا فوری فیصلہ کیا جائے گا، بجلی چوری اور اووربلنگ کے خاتمےکیلئے سمارٹ میٹرنگ کا منصوبہ شروع کیا جارہا ہے، سمارٹ میٹرنگ سے لائن مین اور میٹر ریڈر کا منفی کردار بھی ختم ہوجائےگا۔
