مظفر آباد (نیوزڈیسک) صدر استحکام پاکستان پارٹی آزاد کشمیر وسابق وزیراعظم سردار تنویر الیاس خان کا کہنا ہے کہ استحکام پاکستان پارٹی بہترین انداز میں منظم ہے اور بھرپور طریقے سے الیکشن میں حصہ لے گی، استحکام پاکستان پارٹی پاکستان کو لیڈ کرے گی۔ الیکشن کے دن قریب آ رہے ہیں اور سیاسی درجہ حرارت بڑھے گا۔انہوں نے کہا کہ ملک کو معاشی طور پر مستحکم کرنے اور ٹریک پر لانے کیلئے سخت اقدامات کرنے ہوں گے، منافع خوری، ذخیرہ اندوزی کیخلاف سخت ایکشن نا گزیر ہے، بین الاقوامی سطح کی 5 سے زائد سیاحتی کمپنیاں آزاد کشمیر میں درجن سے زائد آؤٹ لٹ کھولنا چاہتی تھیں۔سردار تنویر الیاس نے مزید کہا کہ آزاد جموں و کشمیر بینک میں کرپشن کی انتہا ہے، آزاد جموں کشمیر بینک میں 120 سے زائد تقرریاں خلاف قانون تھیں جو کہ قابل گرفت ہیں، آزاد کشمیر کے اندر موجودہ حکومت آٹا مل مالکان کو مشکلات کی طرف دھکیل رہی ہے۔