اسلام آباد(نیوزڈیسک)وفاقی دارالحکومت کے جڑواں شہروں اسلام آباد، راولپنڈی اور لاہور سمیت ملک کے مختلف شہروں میں گرج چمک کے ساتھ بارش ،ملکہ کوہسار مری، آزادکشمیر ،بلائی علاقوں میں موسم سرما کی پہلی برفباری جس کے بعد سردی کی شدت میں اضافہ ہوگیا۔ راولپنڈی شہر اور گرد و نواح میں تیز بارش کے بعد سردی بڑھ گئی، بارش کے بعد لاہور کا کم سے کم درجہ حرارت 15 ڈگری سینٹی گریڈ سے نیچے آ گیا جبکہ زیادہ سے زیادہ 20 ڈگری سینٹی گریڈ رہنے کا امکان ہے۔ گڑھی شاہو، ایبٹ روڈ، کینال روڈ، دھرم پورہ، لکشمی چوک، نسبت روڈ، کاہنہ، گجومتہ، فیروز پور روڈ، ساندہ، کرشن نگر، بند روڈ، اچھرہ، چونگی امرسدھو، کلمہ چوک، برکت مارکیٹ ، گلبرگ، گلشن راوی اور دیگر علاقوں میں صبح کے وقت بادل کھل کر برسے ۔علاوہ ازیں پاکپتن، پھالیہ، سکھیکی، وزیر آباد، مریدکے، چنیوٹ، اوکاڑہ، ساہیوال، عارف والا، بہاولنگر، نارووال، گوجرہ، جھنگ، ٹوبہ ٹیک سنگھ، سانگلہ ہل سمیت دیگر شہروں میں بھی بادل برسے ہیں۔بارش کے باعث لاہور کی فضائی آلودگی میں بھی نمایاں کمی کی توقع کی جا رہی ہے، سموگ کے اثرات سے بچانے میں بارش اہم ثابت ہو گی۔بارش کے باعث نشیبی علاقے زیر آب آ گئے، تیز ہوائیں چلنے سے مختلف علاقوں میں بجلی کا ترسیلی نظام بھی متاثر ہو گیا جس کی وجہ سے شہریوں کو شدید مشکلات کا سامنا کرنا پڑا ہے۔ واٹر اینڈ سینیٹیشن ایجنسی (واسا) راولپنڈی نے ہائی الرٹ جاری کردیا، نکاسی کیلئے واسا کا عملہ مشینری کے ساتھ نشیبی علاقوں میں تعینات کردیا گیا۔ترجمان واسا کا کہنا ہے کہ ایم ڈی واسا شہر میں جاری نکاسی آب آپریشن کی نگرانی کر رہے ہیں، نشیبی علاقوں سے پانی نکالنے کے لیے عملہ مصروف عمل ہے۔