مظفرآباد(نیوزڈیسک) فیک انکاؤنٹرز کی اسپیشلسٹ بھارتی فوج کا ایک اور فالس فلیگ آپریشن بری طرح ناکام ۔ جڑی بوٹی کی تلاش میں نکلنے والے وادئ نیلم سے تعلق رکھنے والے 5 کشمیری نوجوان غلطی سے ایل او سی پار چلے گئے، جس پر بھارتی فوج نے انھیں پکڑ کر فالس فلیگ آپریشن کا نشانہ بنا دیا۔ گریس ویلی ساؤناڑ سے تعلق رکھنے والے پانچ نوجوان 2 دن پہلے جڑی بوٹی کی تلاش میں گھر سے نکلے اور ابھی تک واپس نہیں لوٹ سکے ، متاثرہ خاندانوں کے مطابق گمشدہ افراد میں 33 سالہ محمد فیض ولد منگٹا، 26 سالہ شیر افضل ولد نور عالم، 37 سالہ صدیق ولد طواسین، 33 سالہ غلام رسول ولد خان ولی، اور 40 سالہ سرفراز ولد حافظ اللہ شامل ہیں۔متاثرہ گھر والوں نے جوانوں کی گمشدگی کی رپورٹ مقامی پولیس کو درج کروا کر ایف آئی آر کٹوا دی، تاہم آج دو دن بعد اچانک را سے جڑے سوشل میڈیا اکاؤنٹس اور ہندوستانی اخباروں نے جھوٹا اور من گھڑت پروپیگنڈا شروع کر دیا را سے جڑے سوشل میڈیا اکاؤنٹس نے 5 نام نہاد دہشتگردوں کو پکڑنے کا ڈھونگ رچانا شروع کر دیا جس کے بعد بھارتی اخباروں اور پروپیگنڈا بھارتی سوشل میڈیا اکاؤنٹس نے ان پانچ نام نہاد دہشتگردوں کو مارے جانے کا ڈھونگ بھی شروع کر دیا۔مکاری اور سفاکی سے بھرے بھارتی ماضی کو دیکھتے ہوئے یہ خدشہ ہے کہ بھارتی قابض افواج نے جڑی بوٹیاں اکھٹی کرتے ہوئے غلطی سے ایل او سی کراس کرنیوالے ان جوانوں کو شاید مار دیا ۔کینیڈا، قطر، انگلینڈ اور دنیا میں ہزیمت اٹھانے کے بعد ہندوستان اس وقت پوری دنیا میں منہ دیکھانے کے قابل نہیں رہا، سیکیورٹی ماہرین کی اس بات کو نظر انداز نہیں کیا جا سکتا کہ مودی سرکار اپنے سیاسی فائدے اور حالیہ بین الاقوامی جگ ہسائی کو چھپانے کے لیے پاکستان کے خلاف گھٹیا اور اوچھے ہتھکنڈوں پر اتر آئی ہے۔یاد رہے 27 اکتوبر کو قطر نے 8 انڈین نیوی آفیسرز کو جاسوسی کے الزام میں سزائے موت سنائی تھی، جس سے ہندوستان کی دنیا بھر میں رسوائی ہوئی۔ اِسی ہزیمت کو چھپانے کے لیے ہندوستانی فوج نے ظفر وال سیکٹر میں بِلا اشتعال اور اندھا دھند فائرنگ کر کے پاکستان میں سول آبادی کو بھی نشانہ بنایا۔ اِس سے پہلے بھی انڈین انٹیلی جنس ایجنسیز کینیڈا اور انگلینڈ میں سکھوں کو قتل کرنے میں ملوث پائی گئی ہیں، جس سے ہندوستان پوری دنیا میں بدنام ہو چکا ہے۔
