لاہور(نیوزڈیسک)ایل پی جی کی قیمت میں 10روپے فی کلو اضافہ کر دیا گیا، فی کلو ایل پی جی کی قیمت 220 روپے ہوگئی جبکہ پہاڑی اور دور دراز علاقوں میں بھی ایل پی جی کا گھریلو سلنڈر 310 روپے مہنگا ہوگیا۔چیئرمین ایل پی جی ایسوسی ایشن عرفان کھوکھر نے کہاکہ ملک بھر میں ایل پی جی کی بلیک مارکیٹنگ جاری ہے۔انہوں نے کہاکہ ملک میں کسی جگہ سرکاری قیمت پر گیس دستیاب نہیں ہے، گیس مافیا نے اوگرا کی جاری کردہ قیمت ماننے سے انکار کر دیا ،ان کاکہنا تھا کہ حکومت اورآئل اینڈ گیس ریگولیٹری اتھارٹی( اوگرا )سرکاری قیمت پر گیس دستیاب کرنے میں ناکام ہوگئی ہے ،انہوں نے مزید کہاکہ غریب ایل پی جی دکانداروں کے خلاف آپریشن فوری بند کیا جائےجبکہ پلانٹوں سے سرکاری قیمت پر ایل پی جی کی سپلائی کو بھی یقینی بنایا جائے۔