پشاور( اے بی این نیوز )صدر مملکت ڈاکٹر عارف علوی نے کہا ہے کہ پائیدار ترقی اور روشن مستقبل کے لیے اعلیٰ تعلیم کا فروغ ناگزیر ہے۔ انہوں نے یونیورسٹیوں پر زور دیا کہ وہ پاکستان کی ترقی کے لیے گریجویٹس کی تعداد بڑھانے کے لیے ٹیکنالوجی کا استعمال کریں۔صدر مملکت نے ان خیالات کا اظہار گورنر خیبر پختونخوا حاجی غلام علی، نگراں وزیر اعلیٰ محمد اعظم خان اور صوبائی کابینہ کے ارکان سے یہاں گورنر ہاؤس میں ملاقات کے دوران کیا ۔اعلیٰ سطحی اجلاس میں چیف سیکرٹری اور انسپکٹر جنرل آف پولیس خیبر پختونخوا نے بھی شرکت کی۔ ملاقات میں صوبہ کے انتظامی ومالی امور سمیت امن و امان کی مجموعی صورتحال پر تبادلہ خیال کیا گیا۔ ملاقات میں صوبہ بھر بالخصوص ضم اضلاع میں ترقیاتی امور سے متعلق بھی گفتگو کی گئی۔ انضمام کے بعد قبائلی عوام کو درپیش مشکلات و مسائل کے حل کیلئے آئین و قانون کے مطابق اقدامات اٹھانے سے متعلق امور بھی زیر بحث آئے ۔ملاقات میں صوبہ میں پبلک سیکٹرز یونیورسٹیوں کے مالی و انتظامی مشکلات پر سیر حاصل گفتگو کی گئی ۔صدر مملکت نے کہا کہ اعلیٰ تعلیم بہت اہم شعبہ ہے اور خیبرپختونخوا کی یونیورسٹیاں ملک کی خوشحالی کے لیے ٹیکنالوجی کی مدد سے گریجویٹس کی تعداد میں اضافہ کر سکتی ہیں۔
