اسلام آباد(نیوزڈیسک) مسلم لیگ (ن) کے سینئر وفاقی وزیر داخلہ رانا ثنا اللہ نے کہا ہے کہ شہباز شریف نے ہمیشہ خدمت کی سیاست کو فروغ دیا ہے ،ملک کو ڈیفالٹ کے خطرے سے نکالا ہے،ملکی تباہی کا سبب بننے والی حکومت کو آئینی طریقے سے ہٹایا گیا۔آج مارگلہ ایونیو کی افتتاحی تقریب سے خطاب کرتے ہوئے وفاقی وزیر داخلہ رانا ثنا اللہ نے کہا کہ وزیراعظم نے آج دو انتہائی اہمیت کے حامل پراجیکٹس کا افتتاح کیا، ایک حکومت ملک کی تباہی کا باعث بن رہی تھی، اب فتنے کا ادراک اور شناخت ہو چکی ہے۔ انہوں نے کہا کہ میں پوچھتا ہوں کہ ایک کروڑ نوکریاں دینے والے لوگ کہاں ہیں؟ ہمارے دور میں پوری دنیا کے اخبار لکھ رہے تھے کہ پاکستان ایشین ٹائیگر بننے جا رہا ہے، ہم نے لوڈشیڈنگ اور دہشت گردی کا خاتمہ کیا،جب بھی پاکستان آگے بڑھا 12 اکتوبر کسی نہ کسی شکل میں آ جاتا ہے ۔