اسلام آباد(اے بی این نیوز)وزیراعظم محمد شہبازشریف نے کہا ہے کہ خیبر پختونخوا کو ترقی اور امن کا گہوارہ بنا کر رہیں گے، گزشتہ حکومت نے خیبر پختونخوا کی ترقی کو یکسر نظر انداز کیا،بجٹ 2023-24 میں ضم شدہ قبائلی اضلاع کی ترقی کیلئے خصوصی اقدامات شامل کئے ہیں۔ منگل کووزیراعظم آفس کے میڈیا ونگ سے جاری بیان کے مطابق ان خیالات کااظہارانہوں نے خیبر پختونخوا سے تعلق رکھنے والی مسلم لیگی قیادت سے گفتگو کرتے ہوئے کیا جنہوں نے منگل کو یہاں ان سے ملاقات کی۔ملاقات میں وزیر پارلیمانی امور مرتضی جاوید عباسی، مشیرِ وزیرِ اعظم انجنیئر امیر مقام، سینیٹر پیر ثاقب شاہ، ارکانِ قومی اسمبلی کیپٹن محمد صفدر، سجاد احمد، سابق ارکانِ قومی اسمبلی شہاب الدین خان، جمشید محمد، اورنگزیب نلوٹھہ نے شرکت کی۔ملاقات میں موجودہ ملکی سیاسی صورتحال پر گفتگو کی گئی۔خیبر پختونخوا کے آئندہ انتخابات پر تفصیلی مشاورت بھی گفتگو کا حصہ رہی۔ملاقات میں شرکائ نے وزیرِ اعظم کو بجٹ 2023-24 میں خیبرپختونخوا اور قبائلی اضلاع کی ترقی کیلئے اقدامات کی شمولیت پر خراجِ تحسین پیش کیا۔ اس موقع پر وزیراعظم نے کہا کہ خیبر پختونخوا کو ترقی اور امن کا گہوارہ بنا کر رہیں گے۔ گزشتہ حکومت نے خیبر پختونخوا کی ترقی کو یکسر نظر انداز کیا۔ بجٹ 2023-24 میں ضم شدہ قبائلی اضلاع کی ترقی کیلئے خصوصی اقدامات شامل کئے ہیں۔یقینی بنائیں گے کہ وفاقی حکومت کے صحت و تعلیم کے منصوبوں سے خیبر پختونخوا کے عوام بھرپور مستفید ہوں۔ وزیرِ اعظم نے کہاکہ خیبر پختونخوا کے باصلاحیت نوجوانوں کو آسان شرائط پر قرض اور لیپ ٹاپس فراہم کریں گے۔ خیبر پختونخوا کے کسانوں کو معیاری بیج اور برقت کھاد کی فراہمی کے ساتھ ساتھ جدید ٹیکنالوجی سے لیس کریں گے۔ سرحدی اضلاع میں تجارت میں سہولت فراہم کرکے لوگوں کی معاشی مشکلات دور کریں گے۔