اسلام آباد (نیوزڈیسک)اسلام آباد کی مقامی عدالت نے سابق صدر آصف زرداری پر قتل کی سازش کے الزامات کے کیس میں عوامی مسلم لیگ کے سربراہ شیخ رشید کے خلاف فرد جرم کی کارروائی پھر مؤخر کردی۔جوڈیشل مجسٹریٹ عباس شاہ نے شیخ رشید کے کیس کی سماعت کی، سابق وزیر داخلہ کے وکیل سردار شہباز عدالت میں پیش ہوئے۔شیخ رشید کی جانب سے آج حاضری سے استثنیٰ کی درخواست دائر کی گئی۔ملزم کے وکیل سردار شہباز نے دلائل دیتے ہوئے کہا کہ شیخ رشید کو گرفتار کرنے کے لیے پولیس سرگرم ہے ، وہ ضمانت پر ہیں اور کسی کیس میں مطلوب نہیں۔وکیل سردار شہباز نے استدعا کی کہ شیخ رشید موجودہ صورتِ حال میں پیش نہیں ہو سکتے، استثنیٰ دیا جائے۔عدالت نے شیخ رشید کی آج کے لیے حاضری سے استثنیٰ کی درخواست منظور کرلی۔
