لاہور(اے بی این نیوز) چیئرمین پی ٹی آئی عمران خان نے زمان پارک گھر کے سرچ وارنٹ منسوخ کرانے کیلئے انسدادِ دہشتگردی عدالت سے رجوع کر لیا۔سابق وزیر اعظم نے درخواست میں کمشنر لاہور، ڈی سی لاہور سمیت دیگر کو فریق بنایا ۔درخواست میں موقف اختیار کیا ہے کہ دہشتگردی عدالت سے 18 مئی کو پولیس نے سرچ وارنٹ حاصل کئے،پنجاب پولیس ودیگر اداروں نے سرچ وارنٹ بدنیتی کی بنیاد پر حاصل کئے جس مقدمے میں سرچ وارنٹ حاصل کئے گئے اس مقدمے میں درخواست گزار کا کوئی کردار نہیں۔درخواست میں مزید کہا گیا کہ سرچ وارنٹ کے بعد درخواست گزار نے میڈیا کی موجودگی میں فریقین کو سرچ وارنٹ کی اجازت دی۔چیئرمین پی ٹی آئی نے درخواست میں استدعا کی کہ عدالت 18 مئی کو جاری سرچ وارنٹ کالعدم اور غیر قانونی قرار دے۔ عمران خان کی درخواست پر انسداد دہشتگردی عدالت نے نوٹسز جاری کرتے ہوئے فریقین سے جواب طلب کر لیا۔