مدینہ منورہ( اے بی این نیوز )وزارت مذہبی امور کے ترجمان نے کہا ہے کہ مدینہ منورہ میں پاکستانی عازمین حج کی آمد کا سلسلہ جاری ہے، 21 مئی کو شروع ہونےوالے حج فلائٹ آپریشن کے تحت اب تک 32 پروازوں کےذریعے 7337 عازمین مدینہ منورہ پہنچ گئے ہیں۔جمعرات کو اپنے ایک بیان میں انہوں نے کہا کہ جمعرات اور جمعہ کی درمیانی شب تک مزید 13 پروازوں کے ذریعے 3400 عازمین مدینہ منورہ پہنچیں گے۔ انہوں نے کہا کہ وزیر مذہبی امور سینیٹر محمد طلحہٰ محمود کی ہدایت پر مانیٹرنگ ٹیم تشکیل دی گئی ہے جو عازمین حج سے ان کی رہائش گاہوں پر ملاقاتیں کر کے حج انتظامات کے حوالےسے فیڈبیک حاصل کرےگی۔ مدینہ منورہ کے مین کنٹرول آفس کے ذریعے عازمین کی سہولت و رہنمائی کے لئے تمام شعبہ جات مصروف عمل ہے۔ انہوں نے کہا کہ شعبہ گمشدگی و بازیابی میں راستہ بھولنے والے ایک درجن سے زائد ضعیف عازمین کو ان کی رہائش گاہوں تک پہنچایا۔عازمین کرام کے 12 بڑے بیگ تلاش کرکے مالکان کے حوالے کئے گئے۔ ترجمان نے کہاکہ پاکستان حج مشن کے تحت شعبہ خوراک ، رہائش، زیارت جنت البقیع ، مکہ روانگی اور شکایات 2 گھنٹے شفٹوں میں کام کر رہے ہیں ۔مدینہ منورہ میں حج میڈیکل مشن کے تحت قائم ہسپتال میں 8 عازمین حج کو طبی امداد فراہم کی گئی۔
