لاہور (نیوزڈیسک)نگراں وزیر اعلیٰ پنجاب محسن نقوی نے کہا ہے کہ پاکستان تحریک انصاف کی رہنما یاسمین راشد لاہور کے جناح ہاؤس میں ہوئی دہشتگردی کا مرکزی کردار ہیں، کوئی انتقامی کارروائی نہیں ہو رہی۔ پریس کانفرنس کرتے ہوئے محسن نقوی نے کہاکہ دہشتگردی کے واقعات پر جس طرح ہر پاکستانی کو تشویش ہے اسی طرح عدلیہ کو بھی ہوگی، امید ہے کیسز عدالتوں میں جائیں گے تو انصاف پر مبنی فیصلے آئیں گے۔ انہوں نے مزیدکہا کہ جناح ہاؤس پر حملہ کرنے والے سیاسی کارکن نہیں دہشت گرد ہیں، میانوالی بیس پر حملہ آور وہاں موجود طیاروں کو جلانا چاہتے تھے۔محسن نقوی کاکہنا تھاکہ 9 مئی کو پورے پنجاب میں 108 گاڑیاں جلائی گئيں جن میں ریسکیو 1122 کی 8 اور پولیس کی گاڑیاں بھی شامل ہیں، جناح ہاؤس سمیت 23 عمارتیں جلائی گئیں، 400 افراد نے جناح ہاؤس پر حملہ کیا، 3400 افراد جناح ہاؤس کے باہر تھے،ان کا کہنا تھا کہ جناح ہاؤس پر حملہ کرنے والے ایک ایک شخص کو گرفتار کریں گے۔انہوں نے کہا کہ یاسمین راشد لاہور کے جناح ہاؤس میں ہوئی دہشتگردی کا مرکزی کردار ہیں، کوئی انتقامی کارروائی نہیں ہو رہی۔انہوںنے پاکستان کی سیاست میں مداخلت پر امریکا کے سابق نمائندہ خصوصی زلمے خلیل زاد کو بھی آڑے ہاتھوں لیا اور کہا کہ عوام اس کی باتوں میں نہ آئیں،انہوں نے کہاکہ زلمے خلیل زاد کی حیثیت چپڑاسی سے زیادہ کچھ نہیں۔
