مظفرآباد(نیوزڈیسک)آزادجموں وکشمیر الیکشن کمیشن نے ایل اے 15 باغ 2آزادجموں وکشمیر قانون ساز اسمبلی کی خالی نشست پر انتخابات کیلئے جاری شیڈول میں ترمیم کر دی۔ قانو ن سازاسمبلی کی خالی نشست ایل اے 15 باغ 2 میں 08 جون2023 کو ہی پولنگ ہوگی تاہم متذکرہ نشست پر انتخاب میں حصہ لینے والے امیدواران کیلئے کاغذات نامزدگی جمع کروانے کی تاریخ میں توسیع کی گئی ہے۔
آزادجموں وکشمیر الیکشن کمیشن کی جانب سے جاری ترمیمک شیڈول کے مطابق ایل اے 15 باغ 2 کی خالی نشست پر انتخابات میں حصہ لینے کیلئے 14 مئی دن 2 بجے تک کاغذات نامزدگی جمع کروائے جاسکتے ہیں ۔ 15 مئی صبح8 بجے سے سہ پہر2 بجے تک امیدوارن کی جانب سے جمع کروائے گئے کاغذات نامزدگی کی سکروٹنی کے بعد امیدواروں کی فہرست شائع کی جائیگی ۔19مئی2023 کو دن 2 بجے سے قبل امیدواران کی جانب سے کاغذات نامزدگی کی مستردگی کے خلاف الیکشن ٹریبونل کے سامنے اپیلیں دائر کی جا سکیں گی اور22 مئی کو مظفرآباد الیکشن کمیشن کے آفس میں ان اپیلوں کی سماعت ہوگی اور فیصلے دیے جائیں گے۔ 23 مئی کو سہ پہر 2 بجے سے قبل تک امیدوار الیکشن سے دستبرداری کا اعلان کرسکیں گے جس کے بعد امیدواروں کی حتمی فہرست شائع کی جائیگی اور امیدواروں کو انتخابی نشان الاٹ کرنے کے بعد امیدواروں کی حتمی فہرست انتخابی نشانات کے ساتھ شائع کی جائیگی۔ 08 جون 2023 کو صبح 8 بجے سے شام 5 بجے تک حلقہ ایل اے 15 باغ میں پولنگ ہوگی ۔