کراچی ( اے بی این نیوز   )پاکستان تحریک انصاف وائس چیئرمین شاہ محمود قریشی نے پی ٹی آئی چیئرمین عمران خان کے اغوا اور ان پر تشدد کی شدید مذمت کرتے ہوئے پارٹی چیئرمین کی جانب سے فوری طور پر قائم کردہ سات رکنی ایمرجنسی کمیٹی کا اجلاس طلب کرلیا۔ جس میں عمران خان کی محفوظ اور جلد رہائی کو یقینی بنانے کے لیے جامع حکمت عملی تیارکرلی گئی۔مرکزی میڈیا ڈیپارٹمنٹ کی تفصیلات کے مطابق منگل کو ایک بیان میں پی ٹی آئی کے وائس چیئرمین شاہ محمود قریشی نے ’ہنگامی کمیٹی‘ کا اجلاس طلب کیا جس میں سینیٹر سیف اللہ خان نیازی، سینیٹر اعظم سواتی، سینیٹر اعجاز چوہدری، پی ٹی آئی کے سینئر رہنما مراد سعید، علی امین خان گنڈا پور اور حسان نیازی شامل تھے۔نائب چیئرمین شاہ محمود قریشی کا کہنا تھا کہ سینئر قیادت اور ہنگامی کمیٹی کا اجلاس ہر پہلو سے صورتحال کا جائزہ لینے اور جامع لائحہ عمل کا اعلان کرنے کے لیے بلایا گیا ہے۔شاہ محمود قریشی کا کہنا تھا کہ پی ٹی آئی چیئرمین کی پرتشدد گرفتاری مکمل طور پر بلاجواز اور ناقابل قبول ہے، شاہ محمود قریشی نے اعلان کیا کہ پی ٹی آئی چیئرمین کی جلد از جلد رہائی کو یقینی بنانے کے لیے ملک بھر میں پرامن لیکن بھرپوراحتجاج کرے گی۔شاہ محمود قریشی کا کہنا تھاکہ اسلام آباد ہائی کورٹ (IHC) پر عمران خان کوحراست میں لینے کے لیے دھاوا بول دیا گیا۔حالانکہ عمران خان نے عدالت میں پیش ہونے سے پہلے اپنے بیان میں رضاکارانہ طور پر گرفتاری کی پیشکش بھی کی تھی۔انہوں نے مزید کہا کہ عمران خان کو حراست میں لینا ایک فسطائیت ہے اور بائیو میٹرک کے دوران اسلام آباد ہائی کورٹ پر دھاوا بول کر وکلاء کو زخمی کرنا قابل مذمت ہے۔شاہ محمود قریشی نے کہا کہ چیف جسٹس اسلام آباد ہائی کورٹ نے عمران خان کے عدالتی احاطے سے اغوا کا فوری نوٹس لیا۔تاہم، انہوں نے اپیل کی کہ چیف جسٹس اسلام آباد ہائی کورٹ عمران خان کی فوری بازیابی اور عدالت میں پیشی کا حکم جاری کریں۔پی ٹی آئی کے وائس چیئرمین شاہ محمود قریشی نے کہا کہ پوری قوم چیئرمین پی ٹی آئی کی صحت اور حفاظت کے حوالے سے گہری تشویش میں مبتلا ہے۔شاہ محمود قریشی نے اعلان کیا کہ پی ٹی آئی چیئرمین کی گرفتاری کے خلاف پرامن لیکن بھرپوراحتجاج کیا جائےگا۔انہوں نے کہا کہ تحریک انصاف کے چیئرمین کے اغوا اور تشدد کے خلاف پوری قوم میں شدید غم و غصہ ہے۔نائب چیئرمین شاہ محمود قریشی نے کہا کہ پی ٹی آئی قانون کو ہاتھ میں لیے بغیر اپنا بھرپور احتجاج ریکارڈ کرائے گی، شاہ محمود قریشی نےاس عزم کا اظہار کیا کہ وہ چیئرمین کی بحفاظت بازیابی اور رہائی کے لیے سیاسی اور قانونی طریقوں سے یہ جنگ لڑیں گے۔