اسلام آباد (نیوزڈیسک)پبلک اکاؤنٹس کمیٹی (پی اے سی) نے جسٹس مظاہر نقوی کے اثاثوں کی چھان بین کی اجازت دے دی۔چیئرمین نور عالم خان کی زیر صدارت پی اے سی کا اجلاس ہوا، جس میں 14 میں سے 13 ارکان نے جسٹس مظاہر نقوی کے اثاثوں کی چھان بین کی اجازت دی۔اجلاس میں صرف سینیٹر محسن عزیز نے جسٹس مظاہر نقوی کے اثاثوں کی چھان بین کی مخالفت کی۔پی اے سی نے جسٹس مظاہر نقوی کی آمدن، اثاثوں کی تفصیلات اور بیرون ملک سفر کی ہسٹری 15 دنوں میں طلب کرلی۔چیئرمین نور عالم نے کہا کہ آڈیٹر جنرل مظاہر علی نقوی کے پلاٹس کی کیٹگریز کی تحقیقات کرکے رپورٹ جمع کرائیں جبکہ نادرا اُن کے خاندان میں شامل افراد کی لسٹ فراہم کرے۔انہوں نے کہا کہ یہ جسٹس مظاہر یا کسی ایکس وائی کا ایشو نہیں، یہ کرپشن کا ایشو ہے، اس لیے نہیں چھوڑوں گا۔انہوںنے مزید کہا کہ اگر میری بہن، بیٹی، بچوں کے بھی اثاثے آمدن سے زائد ہیں تو پیچھا کروں گا۔انہوں نے یہ کہا کہ پی اے سی کے آئندہ اجلاس میں کوئی غیر حاضر ہوا تو سمن جاری کروں گا،نور عالم خان نے کہاکہ آئندہ پی اے سی اجلاس میں چیف سیکرٹریز نہ آئے تو وارنٹ جاری کروں گا۔