لندن(اے بی این نیوز)سکاٹ لینڈ کے پاکستانی نڑاد فرسٹ منسٹر حمزہ یوسف نے کہا ہے کہ پاکستان کے ساتھ تعلقات کا فروغ میری ذاتی خواہش ہے، وزیراعظم محمد شہباز شریف نے پاکستان کے دورہ کی دعوت دی ہے ،جلد اپنے مادر وطن کا دورہ کروں گا۔ ان خیالات کا اظہار انہوں نے وزیراعظم محمد شہباز شریف سے ملاقات کے بعد میڈیا سے خصوصی گفتگو کرتے ہوئے کیا۔ حمزہ یوسف نے کہا کہ پاکستان اور سکاٹ لینڈ کے دیرینہ تاریخی تعلقات ہیں۔ انہوں نے کہا کہ پاکستان کے ساتھ تعلقات کا فروغ میری ذاتی خواہش ہے۔ انہوں نے مزید کہا کہ وزیراعظم پاکستان نے پاکستان کے دورہ کی دعوت دی ہے، جلد پاکستان کا دورہ کروں گا۔ حمزہ یوسف نے مزید کہا کہ پاکستان میرا مادر وطن ہے اوردل کے قریب ہے، جلد دورہ پاکستان کی خواہش ہے۔ انہوں نے کہا کہ میں پاکستان کی سرزمین کا بیٹا ہوں۔ حمزہ یوسف نے کہا کہ وزیراعظم شہباز شریف سے ملاقات میں باہمی تجارت، تعلیم سمیت مختلف شعبوں میں باہمی تعاون کے فروغ پر گفتگو ہوئی ہے۔ انہوں نے کہا کہ پاکستان اور سکاٹ لینڈ کے باہمی تعلقات کے فروغ کیلئے مل کر کام کریں گے۔
