لاہور(نیوز ڈیسک) پاکستان تحریک انصاف کے چیئرمین عمران خان نے کہا کہ مافیا چیف جسٹس کے پیچھے ہاتھ دھو کر پڑا ہوا ہے،تمام پاکستانی ہفتے کو چیف جسٹس سے اظہاریکجہتی کےلئے باہر نکلیں ، عمران خان نے چیف جسٹس سے اظہار یکجہتی کیلئے ریلیاں نکالنے کا اعلان کر دیا ۔اپنے خصوصی پیغام میں انہوں نے کہا کہ تمام پاکستانی ہفتے کو چیف جسٹس سے اظہاریکجہتی کے لیے ایک گھنٹے کے لیے باہرنکلیں ،ہم عدالتوں کا احترام کرتے ہیں، پاؤں میں تکلیف کے باوجود پیش ہوں گا، ان کی طرح نہیں جن کی مرضی کا فیصلہ نہ آئے تو ججز کیخلاف پراپیگنڈا کرتے ہیں ،اس وقت مافیا چیف جسٹس کے پیچھے ہاتھ دھو کر پڑا ہوا ہے ، اس مافیا نے سپریم کورٹ کو تقسیم کردیا ہے ، پی ڈی ایم والے آئین کی دھجیاں اڑا رہے ہیں۔ انہوں نے کہا کہ قوم کا کال دے رہا ہوں ہفتہ 6 مئی کی شام ساڑھے 5 بجے آپ نے اپنے محلوں میں ، گاؤں میں ایک گھنٹے کیلئے باہر نکلیں ، مہنگائی اور بیروزگاری نے پاکستان میں تباہی مچا رکھی ہے جس کی وجہ سے وہ ڈرے ہوئے ہیں اور پاکستان کے آئین ، سپریم کورٹ اور چیف جسٹس کیخلاف جارہے ہیں۔ا نہوں نے یہ بھی کہا کہ میں پھر 4 ریلیاں کررہا ہوں جن میں اپنے چیف جسٹس اور پاکستان کے آئین کیلئے، اپنا ملک بچاؤ، آئین بچاؤ ،اس ملک کا سپریم کورٹ بچاؤ، یہ ریلیاں ہفتے کے روز ہی لاہور، اسلام آباد، راولپنڈی اور پشاور میں ہوں گی۔عمران خان کی چیف جسٹس سے اظہار یکجہتی کیلئے قوم سے ایک گھنٹہ مختص کرنے اور ریلیاں نکالنے کی اپیل ۔