اسلام آباد(نیوزڈیسک ) وفاقی دارالحکومت اسلام آباد، راولپنڈی ، آزاد کشمیر سمیت ملک کے مختلف علاقوں میں موسلادھار بارش کے بعد موسم انتہائی سرد ہوگیا۔ لوگوں نے دوبارہ گرم کپڑے نکال لئے ۔ جبکہ دوسری جانب محکمہ موسمیات نے ملک کے بالائی علاقوں میں گرج چمک کیساتھ مزید بارش کی اہم پیش گوئی کی ہے۔ آزاد کشمیر، گلگت بلتستان ،خیبرپختونخوا اور خطہ پوٹھوہارمیں تیز ہواوں کے ساتھ بارش کا امکان ہے، جبکہ کوئٹہ ، ژوب، چمن اور پشین میں گرج چمک کے ساتھ بارش متوقع ہے۔ جیکب آباد میں گزشتہ روز درجہ حرارت 43، سبی، خیرپور، مٹھی، شہید بینظیر آباد، روہڑی اور سکرنڈ میں 42 ڈگری ریکارڈ کیا گیا۔ 24 گھنٹے کے دوران سب سے زیادہ بارش مالم جبہ میں 19 ملی میٹر بارش ریکارڈ کی گئی اس کے علاوہ کالام، دورش میں 13، دیر میں 11، بونیر 9، پارا چنار اور کاکول میں 6 ملی میٹر بارش ریکارڈ کی گئی۔ملک میں سب سے کم درجہ حرارت کالام میں 4، پاراچنار 10 اور مالم جبہ میں 8 سینٹی گریڈ ریکارڈ کیا گیا ہے۔محکمہ موسمیات نے ملک کے مختلف علاقوں میں بارش کا سلسلہ 20 اپریل تک جاری رہنے کی پیشگوئی کی ہے جب کہ سندھ اور بلوچستان کے میدانی علاقوں میں موسم خشک اور گرم رہنے کا امکان ہے۔محکمہ موسمیات کے مطابق سندھ اور پنجاب کے بیشتراضلاع میں موسم خشک اورجزوی ابرآلود رہے گا اور سکھر،لاڑکانہ، دادو اور گردونواح میں گرد آلود ہوائیں چلنے کا امکان ہے۔ بلوچستان کے بیشتراضلاع میں موسم خشک اورگرم رہنے کا امکان ہے۔