لاہور (نیوز ڈیسک) پاکستان تحریک انصاف کے چیئرمین سابق وزیر اعظم عمران خان نے کہا کہ معیشت کمزور ہوئی تو بیرونی قرض واپس کرنے کے اہل نہیں رہیں گے، ہم اقتدار میں آئے تو ملک کو ڈیفالٹ نہیں ہونے دیں ۔ تفصیلات کے مطابق تحریک انصاف کے چیئرمین عمران خان نے فنانشل ٹائمز کو انٹرویو دیتے ہوئے کہاکہ کہا کہ اگر معیشت کمزور ہوئی تو ہم بیرونی قرضے واپس کرنے کے اہل نہیں رہیں گے، ڈالرزمیں لیا گیا قرضہ ڈالرز میں ہی واپس کرنا پڑتاہے،اگر ڈالرز میں زرمبادلہ نہیں بڑھتا تو پھر آپ اپنے قرضوں کی ادائیگی کیسے کریں گے؟ملکی قرض بڑھ رہا ہے ہماری معیشت آہستہ آہستہ سکڑ رہی ہے۔ انہوں نے کہا کہ آئی ایم ایف کے ساتھ مذاکرات کے لئے معاشی ماہرین کے ساتھ مشاورت کر رہے ہیں، ایسا طریقہ اپنانا چاہتے ہیں جس سے ہم بیرونی قرض ادا کریں اور ہماری معیشت بھی متاثر نہ ہو۔سابق وزیراعظم نے کہا کہ پاکستان اپنے بدترین معاشی بحران سے گزر رہا ہے،ہم اقتدار میں آئے تو ملک کو ڈیفالٹ نہیں ہونے دیں گے، قرض لینے کے بجائے اصلاحات کے ذریعے معیشت بہتر بنائیں گے۔
