اسلام آباد(اے بی این نیوز)اسپیکر قومی اسمبلی راجہ پرویز اشرف کل ( پیر) کو ڈی چوک میں آئین پاکستان کے 50 سال مکمل ہونے پر گولڈن جوبلی تقریبات کے آغاز پر آئین پاکستان 1973ء کی یادگار کا سنگِ بنیاد رکھیں گے۔ قومی اسمبلی میڈیا ڈائریکٹوریٹ کے مطابق اس موقع پر اسپیکر قومی اسمبلی اراکین پارلیمنٹ کے ہمراہ آئین پاکستان کے 50 سال مکمل ہونے پر گولڈن جوبلی تقریبات کے حوالے سے پریس کانفرنس بھی کریں گے جس کے بعد وہ اراکین پارلیمنٹ کے ہمراہ پارلیمنٹ ہاؤس کے سبزہ زار میں یادگار شہداء جمہوریت کا دورہ کریں گے۔ بعد ازاں اسپیکر راجہ پرویز اشرف اور اراکین پارلیمنٹ قومی اسمبلی میں 1973 کے آئین کی منظوری کے وقت لی گئیں تصویری نمائش دیکھیں گے اور قومی اسمبلی ہال کے سامنے آئین پاکستان کے مسودے کا تفصیلی جائزہ بھی لیں گے۔