کراچی( نیوز ڈیسک) گورنر سندھ کامران ٹیسوری نے کہا کہ گورنر ہاؤس کے دروازے سب کے لیے پورا رمضان کھلے ہیں، شہری افطار ڈنر گورنر ہاؤس میں کرسکتے ہیں۔ تفصیلات کے مطابق آج نمائش چورنگی پر ایک فلاحی ادارے نے سحری کا انتظام کیا جس میں گورنر سندھ کامران ٹیسوری نے شرکت کی اور میڈیا سے خصوصی گفتگوکر تے ہوئے کہا کہ پہلے روزے سے گورنر ہاؤس کے دروازے عوام کے لیے کھلے ہوئے ہیں، عوام پورے 30 دن گورنر ہاؤس میں آئیں افطار ڈنر کریں، جو لوگ آج افطار کے لیے آئیں گے انہیں قرآن مجید اور جائے نماز تحفہ میں دیا جائے گا۔ انہوں نے مزید کہا کہ آج 40 ہزار کمانے والا شخص بھی سحری اور افطاری کی سکت رکھتا ہے، اس دور میں فلاحی ادارے کا یہ اقدام قابل تحسین ہے ،یہ ادارہ اب تک 25 ہزار لوگوں کو راشن پہنچا چکا ہے، یہاں پر 250 دیگیں روزانہ سحری اور افطاری میں بنوائی جاتی ہیں، یہاں آنے والے سب لوگ مڈل کلاس طبقہ ہے جو مہنگائی سے سب سے زیادہ متاثر ہوا ہے ۔ گورنر سندھ کامران ٹیسوری نے لوگوں میں اپنے ہاتھوں سے سحری تقسیم کی ۔