راولپنڈی(نیوز ڈیسک) عوامی مسلم لیگ کے سربراہ شیخ رشید نے کہا کہ عمران خان کو روکنے کا ہر کام اُلٹا حکومت کے گلے پڑتا ہے، نگران حکومتیں منتخب حکومتوں سے دو ہاتھ آگے چلی گئیں، ان کا کام الیکشن کرانا ہے من پسند کا راستہ بنانا نہیں ۔آج سماجی رابطے کی ویب سائٹ ٹویٹر پر اپنی ٹویٹ میں سابق وزیر داخلہ شیخ رشید نے کہا کہ دس مہینے ہو گئے ہیں حکومت کے آئی ایم ایف سے مذکرات جاری ہیں اور نتیجہ نہیں نکل رہا، پنجاب میں الیکشن شیڈول کا اعلان خوش آئند ہے، خدا کرے کہ یہ مؤخر نہ ہو، جس دن انتخابی شیڈول آرہا ہے اُسی دن دفعہ 144 لگائی جارہی ہےاور تحریک انصاف کی پہلے دن الیکشن کمپین میں ایک کارکن جابحق ہوگیا، نگران حکومتیں منتخب حکومتوں سے دو ہاتھ آگے چلی گئیں، اُن کا کام الیکشن کرانا ہے من پسند کا راستہ بنانا نہیں۔ انہوں نے کہا کہ عمران خان اور تحریک انصاف کو روکنے کا ہر کام حکومت کے گلے اُلٹا پڑتا ہے، پیمراکی پابندی قوم کو ٹیلی ویژن کے بجائے سوشل میڈیا پر لے جائے گی، گورنر خیبرپختونخوا سپریم کورٹ کے فیصلے کو عزت نہیں دے رہا اور سپریم کورٹ کے فیصلوں پر سازش کے تحت تاخیر کررہا ہے۔
