اسلام آباد (نیوزڈیسک)ڈی جی ایف آئی اے نے انسانی اسمگلرز کے خلاف سخت کارروائی کا حکم دے دیا۔میڈیارپورٹس کے مطابق ڈی جی ایف آئی اے نے اٹلی کشتی حادثے پر نوٹس لیتے ہوئے رپورٹ طلب کرلی ، اور انسانی اسمگلرز کے خلاف سخت کارروائی کا حکم دے دیا ۔ڈی جی ایف آئی اے نے غیر قانونی بارڈر پار کرنے والوں کیخلاف کارروائی کا حکم دیتے ہوئے کہا کہ انسانی اسمگلنگ جیسے جرم میں ملوث عناصر معافی کے مستحق نہیں، انسانی اسمگلرز اور ان کے سہولتکار بین الاقوامی مجرم ہیں۔ڈائریکٹر جنرل ایف آئی اے نے انٹر ایجنسی ٹاسک فورس کا اجلاس بھی طلب کر لیا، انٹرایجنسی ٹاسک فورس میں شامل اداروں کے ساتھ مل کر موثر حکمت عملی بنائی جائے گی۔ڈی جی ایف آئی اے نے ہدایت جاری کی کہ کشتی حادثوں میں جانبحق اورزخمی ہونے والے پاکستانیوں کے لواحقین سے رابطے تیز کئے جائیں، حادثے میں ملوث انسانی اسمگلرز کیخلاف درج انکوائریز اور کیسز کی تحقیقات کو جلد مکمل کیا جائے۔دوسری جانب ترجمان ایف آئی اے کا کہنا تھا کہ ملزمان کی گرفتاری کے لئے ایف ائی اے لاہور اور بلوچستان زون میں ٹاسک فورس بنا دی گئی ہے، ملزمان کی گرفتاری کے لئے ہر قسم کے وسائل کو بروئے کار لایا جائے گا، انسانی اسمگلرز کے سہولتکاروں کے خلاف بھی سخت کارروائی کی جائے گی، کسی شخص کو بھی معصوم لوگوں کی زندگیوں سے کھیلنے کی اجازت نہیں ہے۔
