اسلام آباد (اے بی این نیوز) سپریم کورٹ نے سابق ایس ایس پی ملیر راؤ انوار کا نام ای سی ایل سے نکالنے کی درخواست پر سماعت کرتے ہوئے وزارت داخلہ کو نوٹس جاری کر دیا۔ پیر کے روز سپریم کورٹ میں جسٹس اعجازالاحسن کی سربراہی میں تین رکنی بینچ نے کیس کی سماعت کی۔ کیس کی سماعت کے دوران درخواست گزار راؤ انوار کے وکیل عمر اسلم نے موقف اختیار کیا کہ جس کیس میں نام ایگزٹ کنٹرول لسٹ (ای سی ایل) میں ڈالا گیا وہ ختم ہو چکا ہے، اب نام ای سی ایل میں رہنے کا کوئی جواز نہیں۔ جس کے بعد عدسلت نے اپنے حکم میں قرار دیا کہ راؤ انوار کے خلاف کیس کا فیصلہ ہو چکا، وکیل کے مطابق راؤ انوار کسی اور کیس میں مطلوب بھی نہیں۔ عدالت نے فریقین کو نوٹسز جاری کرتے ہوئے سماعت غیر معینہ مدت کے لیے ملتوی کر دی۔ واضح رہے کہ راؤ انوار کا نام نقیب اللہ محسود قتل کیس میں ای سی ایل میں ڈالا گیا تھا، ٹرائل کورٹ سے بری ہونے کے فیصلے کے بعد راؤ انوار نے ای سی ایل سے نام نکالنے کے لیے سپریم کورٹ سے رجوع کیا تھا۔