لاہور (نیوزڈیسک)نگراں پنجاب حکومت نے وزیراعظم شہباز شریف کی کفایت شعاری پالیسی پر صوبائی سطح پر عملدرآمد کا فیصلہ کرلیا، وزیراعلیٰ محسن نقوی نے جامع پلان اور قابل عمل تجاویز طلب کرلیں۔نگراں وزیراعلیٰ پنجاب محسن نقوی کی زیر صدارت صوبائی کابینہ کا 7 واں اجلاس ہوا جس میں وزیراعظم شہباز شریف کی جانب سے کفایت شعاری پالیسی پر صوبائی سطح پر عملدرآمد کا فیصلہ کیا گیا، صوبائی کابینہ نے وزیراعظم کی کفایت شعاری پالیسی کو سراہا۔نگراں وزیراعلیٰ پنجاب محسن نقوی نے ہر سطح پر کفایت شعاری اپنانے کیلئے جامع اور سرکاری وسائل کی بچت اور کفایت شعاری کیلئے قابل عمل تجاویز طلب کرلیں۔محسن نقوی نے کہا کہ کفایت شعاری اور بچت کے حوالے سے نگراں وزیراعلیٰ اور صوبائی وزراء مثال قائم کریں گے، معاشی حالات کے پیش نظر سرکاری سطح پر کفایت شعاری اپنانے کیلئے ہر ایک کو اپنا کردار ادا کرنا ہوگا۔صوبائی کابینہ کے اجلاس میں فیصلہ کیا گیا کہ پنجاب حکومت کے افسران ترکیہ اور شام کے زلزلہ متاثرین کی امداد کیلئے ایک سے 3 دن کی تنخواہ عطیہ کریں گے، گریڈ 22 کے افسران 3 دن، گریڈ 20 اور21 کے افسران 2 دن اور گریڈ 18 اور 19 کے افسران ایک دن کی تنخواہ زلزلہ متاثرین کیلئے قائم وزیراعظم ریلیف فنڈ میں عطیہ کریں گے۔نگراں پنجاب کابینہ نے فارن فنڈڈ پراجیکٹس کی تیزی سے تکمیل یقینی بنانے کیلئے فارن فنڈڈ پراجیکٹ کمیٹی کے قیام اور کارپوریٹ ایگریکلچر فارمنگ کیلئے سرکاری اراضی کو سنگل سورس کی بنیاد پر لیز پر دینے کی منظوری دیدی جبکہ ساتھ ہی کہا گیا ہے کہ لیز پر دی گئی اراضی صرف زرعی مقاصد کیلئے استعمال ہوسکے گی۔صوبائی کابینہ نے پولیس شہداء پیکیج کیلئے 40 کروڑ روپے کی ضمنی گرانٹ کی منظوری دیدی، ملتان، بہاولپور اور فیصل آباد میں ریجنل بلڈ سینٹرز کیلئے رجب طیب اردوان اسپتال ٹرسٹ سے معاہدہ کرنے کی منظوری بھی دی گئی۔صوبائی کابینہ نے فیصلہ کیا کہ الائیڈ اسپتال فیصل آباد میں فرینڈز آف الائیڈ اسپتال کے تعاون سے نیا ایمرجنسی بلاک بنایا جائے گا، الائیڈ اسپتال فیصل آباد میں نئی ایمرجنسی بلاک کی تعمیر کیلئے وزیراعلیٰ کی زیر صدارت اجلاس کی کارروائی کی توثیق بھی کردی گئی۔نگراں پنجاب حکومت نے ٹورازم ڈیپارٹمنٹ کا نام ٹورازم، آرکیالوجی اینڈ میوزیم ڈیپارٹمنٹ رکھنے کی منظوری دیدی۔