کراچی (اے بی این نیوز) پی ایس ایل 11 میں راولپنڈی کی ناقص کارکردگی کا سلسلہ جاری ہے، جہاں ٹیم کو مسلسل پانچویں شکست کا سامنا کرنا پڑا۔ اس میچ میں کوئٹہ گلیڈی ایٹرز نے شاندار کھیل پیش کرتے ہوئے 61 رنز سے کامیابی حاصل کی۔
183 رنز کے ہدف کے تعاقب میں راولپنڈی کی ٹیم 121 رنز پر ہی ڈھیر ہو گئی اور کوئی بھی بیٹر بڑی اننگز کھیلنے میں کامیاب نہ ہو سکا۔ سعد مسعود نے 19 گیندوں پر 31 رنز بنائے، جبکہ ڈیرل مچل نے 30، یاسر خان نے 22 اور عبدالفضل نے 20 رنز اسکور کیے، تاہم ٹیم کو جیت دلانے کے لیے یہ کارکردگی ناکافی ثابت ہوئی۔
اس سے قبل کوئٹہ گلیڈی ایٹرز نے مقررہ اوورز میں 6 وکٹوں کے نقصان پر 182 رنز بنائے۔ ٹیم کی جانب سے رائلی روسو نے 53 رنز، سعود شکیل نے 42 اور حسن نواز نے 39 رنز کی شاندار اننگز کھیل کر ٹیم کو مضبوط پوزیشن میں پہنچایا۔
باؤلنگ کے شعبے میں بین سیئرز نے 3 جبکہ محمد عامر نے 2 وکٹیں حاصل کیں، لیکن یہ کوششیں ٹیم کو شکست سے نہ بچا سکیں۔
اس جیت کے ساتھ کوئٹہ گلیڈی ایٹرز نے ایونٹ میں اپنی پوزیشن مستحکم کر لی ہے، جبکہ راولپنڈی کی ٹیم کے لیے یہ مسلسل پانچویں شکست خطرے کی گھنٹی بن گئی ہے۔ سوشل میڈیا پر بھی شائقین کی جانب سے ٹیم کی کارکردگی پر شدید ردعمل دیکھنے میں آ رہا ہے۔
مزید پڑھیں :ایران کو جنگ میں ایک سو چالیس ارب کا نقصان ہوا، العربیہ کا دعویٰ
