اسلام آباد ( اے بی این نیوز )پاکستان نے سعودی عرب پر میزائل اور ڈرون حملوں کی شدید مذمت کرتے ہوئے خطے میں بڑھتی ہوئی کشیدگی پر گہری تشویش کا اظہار کیا ہے۔ ترجمان دفتر خارجہ کے مطابق یہ حملے نہ صرف ایک برادر ملک کی خودمختاری اور علاقائی سالمیت کی سنگین خلاف ورزی ہیں بلکہ عالمی امن کے لیے بھی خطرہ بن سکتے ہیں۔
ترجمان نے کہا کہ سعودی عرب کے مشرقی علاقوں میں توانائی سے متعلق تنصیبات کو نشانہ بنانا انتہائی تشویشناک ہے، کیونکہ ایسی تنصیبات عالمی توانائی کی فراہمی کے لیے کلیدی حیثیت رکھتی ہیں۔ حملوں کے نتیجے میں ہونے والے جانی نقصان پر افسوس کا اظہار کرتے ہوئے متاثرہ خاندانوں سے تعزیت بھی کی گئی ہے۔
بیان میں مزید کہا گیا کہ پاکستان سعودی عرب کے ساتھ مکمل یکجہتی کا اظہار کرتا ہے اور مشکل کی اس گھڑی میں اس کے ساتھ کھڑا ہے۔ ساتھ ہی اس بات پر زور دیا گیا کہ خطے میں امن و استحکام کے لیے ایسے اقدامات سے گریز ضروری ہے جو صورتحال کو مزید بگاڑ سکتے ہیں۔
ترجمان نے واضح کیا کہ پاکستان سعودی عرب کی سلامتی کے لیے اپنی غیر متزلزل حمایت کا اعادہ کرتا ہے اور ہر اس اقدام کی مخالفت کرتا ہے جو خطے میں عدم استحکام کو ہوا دے۔ سفارتی حلقوں کے مطابق اس بیان سے ظاہر ہوتا ہے کہ پاکستان علاقائی تنازعات میں توازن اور امن کے فروغ کے مؤقف پر قائم ہے۔
مزید پڑھیں :برڈ فلو پھیل گیا،پولٹری انڈسٹری کو شدید خطرات لاحق
