تہران ( اے بی این نیوز ) ایران کی جانب سے اسرائیل پر مزید میزائل حملوں کے دعوے سامنے آئے ہیں۔ اطلاعات کے مطابق ان تازہ حملوں میں مختلف اہداف کو نشانہ بنایا گیا، جس کے بعد خطے میں صورتحال مزید نازک ہو گئی ہے۔ذرائع کے مطابق ایران نے کلسٹر نوعیت کے میزائل استعمال کرنے کا دعویٰ کیا ہے، جبکہ حملوں کے نتیجے میں تل ابیب میں نقصان کی اطلاعات سامنے آئی ہیں۔ مقامی سطح پر عمارتوں اور دیگر تنصیبات کو متاثر ہونے کی خبریں گردش کر رہی ہیں، تاہم مکمل تفصیلات ابھی واضح نہیں ہو سکیں۔
مزید رپورٹس میں کہا گیا ہے کہ حیفہ میں واقع بندرگاہ اور دفاعی نظام کو بھی نشانہ بنایا گیا۔ ایرانی ذرائع کے مطابق وہاں عسکری نوعیت کے نظام اور ریڈار تنصیبات پر میزائل داغے گئے، تاہم ان دعوؤں کی آزاد ذرائع سے تصدیق نہیں ہو سکی۔
اسی دوران ایران کی جانب سے یہ بھی کہا گیا ہے کہ بین گوریان ائیرپورٹ کے قریب ایندھن کے ذخائر کو نشانہ بنایا گیا، جس سے ممکنہ طور پر ہوابازی کے نظام پر اثر پڑ سکتا ہے۔ اس حوالے سے بھی باضابطہ تصدیق سامنے نہیں آئی۔
دوسری جانب اسرائیل کی طرف سے ان حملوں پر مکمل ردعمل اور نقصانات کی تفصیلات جاری نہیں کی گئیں،فی الحال مختلف ذرائع سے آنے والی معلومات کی تصدیق کا عمل جاری ہے، جبکہ عالمی برادری اس تیزی سے بدلتی صورتحال پر گہری نظر رکھے ہوئے ہے۔
مزید پڑھیں :بریکنگ نیوز.. ایران نے امریکی F- 16 کا شکار کر لیا
