واشنگٹن (اے بی این نیوز )ڈونلڈ ٹرمپ نے اپنے تازہ بیان میں نیٹو کے حوالے سے سخت مؤقف اختیار کرتے ہوئے اسے تنقید کا نشانہ بنایا ہے۔ ان کا کہنا ہے کہ امریکا کے بغیر نیٹو ایک کاغذی طاقت کے سوا کچھ نہیں، جبکہ بعض اتحادی ممالک نے اہم عالمی معاملات میں متوقع کردار ادا نہیں کیا۔اپنے بیان میں انہوں نے کہا کہ جاری صورتحال میں جنگ کو فوری طور پر اپنے حق میں مکمل کر لیا گیا ہے اور خطرات کی سطح بھی نمایاں طور پر کم ہو چکی ہے۔ تاہم ان کے مطابق نیٹو کے کئی رکن ممالک اب بھی تیل کی بڑھتی ہوئی قیمتوں پر شکایت کر رہے ہیں، مگر عملی تعاون سے گریز کر رہے ہیں۔
ڈونلڈ ٹرمپ نے خاص طور پر آبنائے ہرمز کے معاملے کا ذکر کرتے ہوئے کہا کہ یہ راستہ کھولنا ایک نسبتاً آسان اور کم خطرناک اقدام تھا، لیکن اتحادی ممالک نے اس میں فعال کردار ادا نہیں کیا۔ ان کے مطابق تیل کی قیمتوں میں اضافے کی ایک بڑی وجہ اسی راستے میں پیدا ہونے والی رکاوٹیں ہیں، جس کے اثرات عالمی منڈیوں پر پڑ رہے ہیں۔
انہوں نے یہ بھی کہا کہ ایران کو جوہری طاقت بننے سے روکنے کے لیے جاری کوششوں میں اتحادی ممالک نے بھرپور شرکت نہیں کی، جو ایک تشویشناک امر ہے۔ ان کے بقول اس طرزِ عمل کو تاریخ میں یاد رکھا جائے گا اور اس کے نتائج طویل مدت میں سامنے آئیں گے۔
مزید پڑھیں :عید الفطر کا چاند ہر طرف خوشیاں، سکون اور بھائی چارہ لے کر آئے، مریم نواز
