لاہور ( اے بی این نیوز ) پنجاب حکومت نے عید کے موقع پر شہریوں کو مالی سہولت دینے کے لیے خصوصی پروگرام کا اعلان کر دیا ہے۔ اس منصوبے کے تحت مستحق شہریوں کو عید سے قبل پانچ ہزار روپے عیدی دی جائے گی تاکہ وہ عید کی تیاریوں کے دوران ضروری اخراجات پورے کر سکیں۔اس پروگرام کا مقصد کم آمدنی والے خاندانوں کو عید کے موقع پر ریلیف فراہم کرنا ہے تاکہ وہ خوراک، کپڑوں اور دیگر گھریلو ضروریات کی خریداری باآسانی کر سکیں۔ حکام کے مطابق مالی امداد براہ راست مستحق افراد تک پہنچانے کے لیے جدید ڈیجیٹل طریقہ کار اختیار کیا گیا ہے۔
اس سکیم سے فائدہ اٹھانے کے لیے درخواست گزار کا پنجاب کا رہائشی ہونا ضروری ہے۔ عمر کم از کم بارہ سال ہونی چاہیے۔ بالغ افراد کے لیے شناختی کارڈ جبکہ بارہ سے سترہ سال کے افراد کے لیے ب فارم درکار ہوگا۔ اس کے علاوہ فعال موبائل نمبر اور ایزی پیسہ یا جاز کیش اکاؤنٹ ہونا بھی لازمی قرار دیا گیا ہے۔
حکام کے مطابق رجسٹریشن کا عمل انتہائی آسان رکھا گیا ہے تاکہ شہروں کے ساتھ دیہی علاقوں کے لوگ بھی بغیر کسی مشکل کے درخواست دے سکیں۔ شہری پنجاب حکومت کی سرکاری ویب سائٹ یا پورٹل پر جا کر اپنا شناختی کارڈ یا ب فارم نمبر درج کریں گے، اس کے بعد رجسٹرڈ موبائل نمبر اور ایزی پیسہ یا جاز کیش پرس منتخب کر کے مطلوبہ معلومات فراہم کرنا ہوں گی۔ درخواست جمع ہونے کے بعد تصدیقی عمل مکمل کیا جائے گا اور اہل افراد کو ایس ایم ایس کے ذریعے اطلاع دی جائے گی۔ تصدیق کے بعد رقم براہ راست متعلقہ اکاؤنٹ میں منتقل کر دی جائے گی۔
حکومت نے اہلیت معلوم کرنے کے لیے دو طریقے بھی بتائے ہیں۔ پہلا طریقہ یہ ہے کہ شہری اپنا شناختی کارڈ نمبر سرکاری کوڈ پر ایس ایم ایس کے ذریعے بھیجیں جس کے جواب میں انہیں اہلیت کے بارے میں آگاہ کر دیا جائے گا۔ دوسرا طریقہ آن لائن پورٹل ہے جہاں شناختی کارڈ نمبر درج کرنے پر سسٹم فوراً بتا دے گا کہ درخواست گزار اس پروگرام کے لیے اہل ہے یا نہیں۔حکام کا کہنا ہے کہ ڈیجیٹل ادائیگی کے ذریعے اس پروگرام کو تیز، محفوظ اور شفاف بنایا گیا ہے۔ شہریوں کو ہدایت کی گئی ہے کہ رجسٹریشن کے لیے صرف سرکاری ذرائع استعمال کریں اور غیر مصدقہ معلومات یا جعلی ویب سائٹس سے بچیں۔
