تہران (اے بی این نیوز )ایران کی اعلیٰ سیکیورٹی قیادت کی جانب سے مسلم امہ اور مسلم ممالک کی حکومتوں کے نام ایک اہم پیغام جاری کیا گیا ہے جس میں موجودہ علاقائی صورتحال اور امریکا و اسرائیل کے ساتھ جاری کشیدگی کے تناظر میں واضح مؤقف پیش کیا گیا ہے۔ ایرانی سیکیورٹی چیف علی لاریجانی نے چھ نکات پر مشتمل پیغام میں مسلم دنیا سے اتحاد اور واضح موقف اختیار کرنے کا مطالبہ کیا ہے۔
علی لاریجانی نے اپنے بیان میں کہا کہ امریکا اور اسرائیل کے خلاف ایران اپنی جدوجہد میں ثابت قدم ہے اور کسی دباؤ کے آگے جھکنے کا ارادہ نہیں رکھتا۔ انہوں نے مسلم ممالک کو مخاطب کرتے ہوئے کہا کہ موجودہ حالات میں انہیں فیصلہ کرنا ہوگا کہ وہ کس کے ساتھ کھڑے ہیں کیونکہ خطے کی صورتحال ایک بڑے موڑ پر پہنچ چکی ہے۔
انہوں نے اس بات پر افسوس کا اظہار کیا کہ جب ایران پر حملہ کیا گیا تو کئی مسلم اکثریتی ممالک کی جانب سے واضح حمایت سامنے نہیں آئی۔ ان کے مطابق ایران سے یہ توقع نہیں کی جا سکتی کہ وہ خاموشی اختیار کرے اور اپنی سلامتی کے خلاف اقدامات پر ردعمل نہ دے۔
ایرانی سیکیورٹی چیف نے کہا کہ اس وقت اصل مقابلہ ایک واضح شکل اختیار کر چکا ہے جس میں ایک طرف امریکا اور اسرائیل ہیں جبکہ دوسری طرف ایران اور مزاحمتی قوتیں موجود ہیں۔ ان کے مطابق اس صورتحال میں مسلم ممالک کے لیے غیر جانبدار رہنا مشکل ہوتا جا رہا ہے اور انہیں اپنا مؤقف واضح کرنا ہوگا۔
انہوں نے مسلم اتحاد کی ضرورت پر زور دیتے ہوئے کہا کہ ایران خطے پر تسلط قائم کرنے کا خواہاں نہیں بلکہ اس کی خواہش ہے کہ امت مسلمہ متحد ہو کر اپنے مشترکہ مفادات اور خودمختاری کا تحفظ کرے۔ ان کا کہنا تھا کہ اگر مسلم ممالک متحد ہو جائیں تو خطے میں طاقت کا توازن تبدیل ہو سکتا ہے۔
علی لاریجانی نے مزید کہا کہ مسلم دنیا کو یہ حقیقت سمجھنی چاہیے کہ امریکا اور اسرائیل ان کے حقیقی اتحادی نہیں بلکہ ان کے مفادات اکثر مسلم ممالک کے مفادات کے برعکس ہوتے ہیں۔ انہوں نے دعویٰ کیا کہ ایرانی قوم کے مضبوط عزم اور مزاحمت کے باعث مخالف قوتیں دباؤ میں نظر آ رہی ہیں۔
انہوں نے یہ بھی کہا کہ ایران پر حملہ ایسے وقت میں کیا گیا جب مذاکرات جاری تھے، جسے ایران نے اعتماد کے خلاف اقدام قرار دیا ہے۔ اس بیان کے بعد مشرق وسطیٰ کی صورتحال ایک بار پھر عالمی توجہ کا مرکز بن گئی ہے اور سوشل میڈیا پر بھی اس پیغام پر بھرپور بحث جاری ہے۔
مزید پڑھیں :ایران کے بجلی گھروں کو ایک گھنٹے کے اندر تباہ کرنے کی صلاحیت رکھتے ہیں،ٹرمپ
