تہران (اے بی این نیوز)تہران سے سامنے آنے والی تازہ اطلاعات کے مطابق ایرانی پولیس کے سربراہ نے انکشاف کیا ہے کہ ملک کے مختلف علاقوں میں دشمنوں کو حساس معلومات فراہم کرنے کے الزام میں پانچ سو سے زائد افراد کو گرفتار کرلیا گیا ہے۔ پولیس حکام کے مطابق یہ گرفتاریاں حالیہ سکیورٹی کارروائیوں کے دوران عمل میں لائی گئیں جن کا مقصد ملک میں جاری کشیدگی کے دوران داخلی سلامتی کو یقینی بنانا ہے۔
ایرانی پولیس چیف نے بتایا کہ سکیورٹی اداروں کو اطلاع ملی تھی کہ کچھ افراد ملک کے حساس مقامات اور اہداف سے متعلق معلومات بیرونی دشمنوں تک پہنچا رہے تھے۔ ان معلومات کو مبینہ طور پر ایسے حملوں کیلئے استعمال کیا جانا تھا جن سے اہم تنصیبات اور عوامی مقامات کو نشانہ بنایا جاسکتا تھا۔ اس اطلاع کے بعد ملک کے مختلف شہروں میں خفیہ نگرانی اور کارروائیوں کا آغاز کیا گیا۔
حکام کے مطابق تحقیقات کے دوران ایسے نیٹ ورکس کا سراغ لگایا گیا جو دشمن قوتوں کیلئے معلومات جمع کرنے اور منتقل کرنے میں ملوث تھے۔ پولیس کا کہنا ہے کہ گرفتار کیے گئے افراد سے تفتیش جاری ہے اور مزید انکشافات متوقع ہیں۔ سکیورٹی اداروں نے یہ بھی دعویٰ کیا ہے کہ ان کارروائیوں کے ذریعے ایک بڑے منصوبے کو ناکام بنایا گیا ہے۔
پولیس چیف کا کہنا تھا کہ ایران کی سلامتی پر کسی قسم کا سمجھوتہ نہیں کیا جائے گا اور جو بھی ملک کے خلاف سازش میں ملوث پایا گیا اس کے خلاف سخت قانونی کارروائی کی جائے گی۔ انہوں نے عوام سے بھی اپیل کی کہ وہ کسی بھی مشکوک سرگرمی کی فوری اطلاع سکیورٹی اداروں کو دیں تاکہ ملک کو درپیش خطرات سے بروقت نمٹا جاسکے۔
دوسری جانب ایرانی حکام کا کہنا ہے کہ موجودہ حالات میں دشمن قوتیں مختلف طریقوں سے ملک کو نقصان پہنچانے کی کوشش کر رہی ہیں، تاہم سکیورٹی ادارے ہر قسم کی سازش کا بروقت مقابلہ کرنے کیلئے مکمل طور پر متحرک ہیں۔ حکام نے واضح کیا کہ ایران کے اندرونی استحکام اور قومی سلامتی کے تحفظ کیلئے ایسے عناصر کے خلاف کارروائیاں مزید تیز کی جائیں گی۔
مزید پڑھیں :پٹرولیم مصنوعات کی قیمتوں میں ہو شربا اضافہ،جا نئے فی لٹر کتنا مہنگا ہوا
