اسلام آباد (اے بی این نیوز) بلوچستان کی سیاست میں ایک اہم پیش رفت سامنے آئی ہے جہاں معروف بلوچ رہنما شفیق الرحمن مینگل نے صدرِ مملکت آصف علی زرداری سے ملاقات کے بعد باقاعدہ طور پر پاکستان پیپلز پارٹی میں شمولیت کا اعلان کر دیا۔

تفصیلات کے مطابق شفیق الرحمن مینگل نے اسلام آباد میں صدر آصف علی زرداری سے تفصیلی ملاقات کی جس میں بلوچستان کی موجودہ سیاسی صورتحال، ترقیاتی منصوبوں اور صوبے میں سیاسی استحکام کے حوالے سے گفتگو کی گئی۔ ملاقات کے دوران پاکستان پیپلز پارٹی بلوچستان کے سینئر نائب صدر علی حسن زہری، پارٹی رہنما ملک چنگیز خان اور دیگر سیاسی شخصیات بھی موجود تھیں۔

شفیق الرحمن مینگل کی پیپلز پارٹی میں شمولیت کو بلوچستان میں پارٹی کی سیاسی قوت میں اضافے کے طور پر دیکھا جا رہا ہے۔ سیاسی مبصرین کا کہنا ہے کہ بلوچستان میں مختلف سیاسی دھڑوں کے درمیان جاری سیاسی سرگرمیوں کے دوران اس طرح کی شمولیتیں آئندہ سیاسی منظرنامے پر اثر انداز ہو سکتی ہیں۔

ملاقات کے دوران صدر آصف علی زرداری نے شفیق الرحمن مینگل کا پارٹی میں خیر مقدم کرتے ہوئے کہا کہ پاکستان پیپلز پارٹی ہمیشہ سے وفاق کی مضبوطی اور تمام صوبوں کی یکساں ترقی پر یقین رکھتی ہے۔ انہوں نے اس امید کا اظہار بھی کیا کہ شفیق الرحمن مینگل کی شمولیت سے بلوچستان میں پارٹی مزید فعال کردار ادا کر سکے گی۔

دوسری جانب شفیق الرحمن مینگل نے اس موقع پر گفتگو کرتے ہوئے کہا کہ انہوں نے ملک اور بلوچستان کے بہتر مستقبل کو مدنظر رکھتے ہوئے پاکستان پیپلز پارٹی میں شمولیت کا فیصلہ کیا ہے۔ ان کا کہنا تھا کہ پیپلز پارٹی ایک عوامی جماعت ہے جس نے ہمیشہ جمہوریت، آئین اور عوامی حقوق کے لیے جدوجہد کی ہے۔

انہوں نے مزید کہا کہ بلوچستان کے عوام کو درپیش مسائل کے حل کے لیے مشترکہ کوششوں کی ضرورت ہے اور وہ پیپلز پارٹی کے پلیٹ فارم سے صوبے کی ترقی، امن اور استحکام کے لیے اپنا کردار ادا کریں گے۔

مزید پڑھیں۔اسکولوں میں 9 مارچ سے تعطیلات کا آغاز! بڑی خبر آگئی