اسلام آباد ( اے بی این نیوز )افغان طالبان کی جانب سے مبینہ بلااشتعال جارحیت کے بعد پاک فوج کی مؤثر اور فیصلہ کن جوابی کارروائیاں تاحال جاری ہیں۔ سیکیورٹی ذرائع کے مطابق سرحدی علاقوں میں دشمن کی متعدد پوسٹوں کو بھاری نقصان پہنچایا گیا ہے جبکہ پاکستانی فورسز پوری تیاری اور حکمت عملی کے ساتھ دشمن کے ٹھکانوں کو نشانہ بنا رہی ہیں۔
ذرائع کا کہنا ہے کہ جوابی کارروائی کے دوران خیبر پوسٹ، قومی سر کمپلیکس اور خاور پوسٹ کو شدید نقصان پہنچایا گیا۔ سیکیورٹی حکام کے مطابق دشمن کی عسکری تنصیبات اور مورچوں کو خصوصی طور پر نشانہ بنایا گیا تاکہ آئندہ کسی بھی قسم کی جارحیت کا مؤثر سدباب کیا جا سکے۔
سیکیورٹی ذرائع نے مزید بتایا کہ بھرپور اور طاقتور جواب کے نتیجے میں افغان طالبان فورسز کو بھاری نقصان کا سامنا کرنا پڑا ہے۔ پاک فوج کی جانب سے کی جانے والی کارروائیاں نہایت مربوط اور جدید حکمت عملی کے تحت کی جا رہی ہیں تاکہ سرحدی علاقوں میں پائیدار امن کو یقینی بنایا جا سکے۔
ذرائع کے مطابق مسلح افواج نے افغانستان کے علاقہ پکتیا میں موجود طالبان پوسٹ کو بھی شدید نقصان پہنچایا۔ اس کارروائی کا مقصد سرحد پار سے ہونے والی دراندازی اور اشتعال انگیزی کو روکنا ہے۔ پاکستانی سیکیورٹی فورسز مسلسل نگرانی اور مؤثر ردعمل کے ذریعے ملکی سالمیت کا دفاع کر رہی ہیں۔
سیکیورٹی ذرائع کا کہنا ہے کہ مسلح افواج وطن کی حفاظت کے لیے سیسہ پلائی دیوار بن کر کھڑی ہیں اور کسی بھی جارحیت کا منہ توڑ جواب دینے کی مکمل صلاحیت رکھتی ہیں۔ قوم کی جانب سے بھی افواج پاکستان کے حق میں بھرپور حمایت اور یکجہتی کا اظہار کیا جا رہا ہے، سوشل میڈیا پر عوام کی بڑی تعداد اپنے محافظوں کو خراج تحسین پیش کر رہی ہے اور وطن کے دفاع کے عزم کا اعادہ کر رہی ہے۔
مزید پڑھیں :فتنہ الخوارج کی ایبٹ آباد، صوابی اور نوشہرہ میں چھوٹے ڈرونز سے حملے کی کوشش
