اسلام آباد (  اے بی این نیوز   )وزارتِ دفاع کی جانب سے سرکاری ملازمتوں کے خواہشمند افراد کے لیے بڑی خوشخبری سامنے آ گئی ہے، جہاں گریڈ 1 سے گریڈ 18 تک سیکڑوں آسامیوں کا اعلان کر دیا گیا ہے۔وزارتِ دفاع نے ایک بڑے پیمانے پر بھرتیوں کا اشتہار جاری کیا ہے، جس کے تحت مختلف شعبوں میں پاکستانی شہریوں سے درخواستیں طلب کی گئی ہیں۔ ان ملازمتوں میں تکنیکی، انتظامی، سیکیورٹی، طبی، کلریکل اور معاون عملے کی متعدد پوسٹس شامل ہیں۔

سرکاری اشتہار کے مطابق تمام امیدواروں کے لیے تعلیمی قابلیت، متعلقہ تجربہ، عمر کی حد اور کوٹہ پالیسی پر پورا اترنا لازمی ہوگا۔ بھرتیاں میرٹ اور صوبائی کوٹہ کی بنیاد پر کی جائیں گی۔اعلان کردہ آسامیوں میں ڈپٹی ڈائریکٹر، اسسٹنٹ ڈائریکٹر، انجینئرنگ، کمپیوٹر پروگرامنگ، ریسرچ اینڈ اینالیسس، چارج نرس، سب انسپکٹر، اسسٹنٹ، کلرک، ٹیکنیکل اسٹاف، سیکیورٹی اسٹاف، ڈرائیور، الیکٹریشن، مکینک، مالی، نائب قاصد، چوکیدار، باورچی اور دیگر گریڈ ون کی پوسٹس شامل ہیں۔

وزارتِ دفاع نے واضح کیا ہے کہ تمام عمر اور تعلیمی شرائط کا اطلاق درخواست جمع کرانے کی آخری تاریخ یکم مارچ 2026 تک کیا جائے گا۔اشتہار کے مطابق مخصوص طبقات کو عمر میں رعایت بھی دی جائے گی۔ شیڈولڈ کاسٹ، بدھ مت کمیونٹی، قبائلی علاقوں، آزاد کشمیر اور گلگت بلتستان کے امیدواروں کو تین سال کی رعایت دی جائے گی۔ دیہی سندھ اور بلوچستان سے تعلق رکھنے والے امیدواروں کو بی ایس 15 تک کی پوسٹس کے لیے تین سال کی چھوٹ حاصل ہوگی۔ سرکاری ملازمین، سابق فوجی اہلکار، معذور افراد، جبکہ دورانِ ملازمت وفات پانے والے سرکاری ملازمین کے اہلِ خانہ کو بھی مقررہ قواعد کے تحت عمر میں رعایت دی جائے گی۔

وزارت نے واضح کیا ہے کہ خواتین، اقلیتوں اور معذور افراد کے کوٹہ پر سختی سے عمل کیا جائے گا۔اسکریننگ ٹیسٹ میں منفی مارکنگ ہو گی اور ہر غلط جواب پر 0.25 نمبر کاٹ لیے جائیں گے، جبکہ ٹیسٹ یا انٹرویو کے لیے کوئی ٹی اے یا ڈی اے نہیں دیا جائے گا۔

درخواست دینے کا طریقہ مکمل طور پر آن لائن رکھا گیا ہے۔ امیدوار ویب سائٹ [www.recruitments.com.pk](http://www.recruitments.com.pk) کے ذریعے درخواست فارم پُر کر سکتے ہیں، کسی قسم کی ہارڈ کاپی جمع کرانے کی ضرورت نہیں ہوگی۔درخواست فیس 1 بل انوائس سسٹم کے ذریعے مختلف بینکوں، اے ٹی ایم، انٹرنیٹ بینکنگ، ایزی پیسہ، جاز کیش، یو بی ایل اومنی یا ٹی سی ایس کے ذریعے جمع کروائی جا سکے گی۔ فیس ناقابلِ واپسی اور ناقابلِ منتقلی ہوگی۔

فیس کی تفصیل کے مطابق بی ایس 17 اور 18 کے لیے 2500 روپے، بی ایس 14 تا 16 کے لیے 2000 روپے، بی ایس 9 تا 13 کے لیے 1600 روپے، بی ایس 7 کے لیے 1200 روپے اور بی ایس 1 تا 6 کے لیے 800 روپے مقرر کی گئی ہے۔ معذور افراد فیس سے مستثنیٰ ہوں گے، بشرطیکہ متعلقہ سرٹیفکیٹ فراہم کیا جائے۔وزارتِ دفاع نے یہ بھی واضح کیا ہے کہ ٹیسٹ اور نتائج سے متعلق کوئی اطلاع بذریعہ ڈاک نہیں بھیجی جائے گی، امیدواروں کو ہدایت کی گئی ہے کہ وہ باقاعدگی سے ویب سائٹ وزٹ کریں اور اپنا موبائل نمبر فعال رکھیں۔درخواست جمع کرانے کی آخری تاریخ یکم مارچ 2026 ہے۔

مزید پڑھیں :ورک ویزہ اوپن؟پاکستانیوں کیلئے خوشخبری،جا نئے کس ملک نے یہ اعلان کیا