اسلام آباد (اے بی این نیوز ) اسلام آباد کی ڈسٹرکٹ اینڈ سیشن کورٹ نے متنازع ٹوئٹس کیس میں ایڈووکیٹ ایمان مزاری اور ان کے شوہر ہادی علی کو مجموعی طور پر 17، 17 سال قید کی سزا سنا دی ہے۔ یہ فیصلہ ایڈیشنل سیشن جج افضل مجوکہ نے سنایا جبکہ 22 صفحات پر مشتمل تحریری حکم نامہ بھی جاری کر دیا گیا۔
عدالتی فیصلے کے مطابق دونوں ملزمان کو پیکا ایکٹ کے سیکشن 9 کے تحت 5، 5 سال قید اور 50، 50 لاکھ روپے جرمانے کی سزا سنائی گئی۔ اسی طرح سیکشن 10 کے تحت ایمان مزاری اور ہادی علی کو 10، 10 سال قید اور 3، 3 کروڑ روپے جرمانہ عائد کیا گیا۔
مزید برآں سیکشن 26 اے کے تحت دونوں کو 2، 2 سال قید اور 10، 10 لاکھ روپے جرمانے کی سزا دی گئی۔ عدالت نے واضح کیا کہ مجموعی طور پر دونوں ملزمان کو 17، 17 سال قید اور 3 کروڑ 60 لاکھ روپے جرمانے کی سزائیں سنائی گئی ہیں۔ تاہم پیکا ایکٹ کے سیکشن 11 کے تحت عدالت نے ایمان مزاری اور ہادی علی کو بری کر دیا۔
فیصلہ سنائے جانے کے بعد عدالت نے دونوں ملزمان کو 14 روزہ جوڈیشل ریمانڈ پر جیل بھیجنے کا حکم دے دیا۔ اس سے قبل سماعت کے دوران ایمان مزاری نے مؤقف اختیار کیا تھا کہ وہ عدالتی کارروائی کا بائیکاٹ کرتی ہیں، جس کے بعد دونوں ملزمان نے عدالتی کارروائی میں حصہ نہ لینے کا اعلان کیا تھا۔
عدالت نے کیس کا ریکارڈ اور شواہد مکمل ہونے پر فیصلہ محفوظ کیا تھا، جو بعد ازاں سنایا گیا۔ یہ کیس سوشل میڈیا پر متنازع ٹوئٹس کے حوالے سے خاصی توجہ کا مرکز بنا رہا اور اس فیصلے کو سائبر کرائم قوانین کے تحت ایک اہم پیش رفت قرار دیا جا رہا ہے۔
مزید پڑھیں :آٹا مہنگا،جا نئے نئی قیمت بارے
