لاہور(اے بی این نیوز )محکمہ موسمیات نے ملک بھر کے لیے آئندہ دنوں کے دوران موسم کی تفصیلی پیشگوئی جاری کرتے ہوئے خبردار کیا ہے کہ سردی کی شدت برقرار رہے گی، جبکہ بعض علاقوں میں ہلکی بارش، برفباری اور شدید دھند کا امکان ہے۔محکمہ موسمیات کے مطابق آج رات ملک کے بیشتر حصوں میں موسم سرد اور خشک رہے گا، تاہم پہاڑی علاقوں میں شدید سردی محسوس کی جا سکتی ہے۔ بالائی خیبرپختونخوا اور گلگت بلتستان میں مطلع جزوی ابر آلود رہنے کے ساتھ چند مقامات پر ہلکی بارش اور ہلکی برفباری متوقع ہے۔ اسی دوران پنجاب، بالائی سندھ اور خیبرپختونخوا کے میدانی علاقوں میں درمیانی سے شدید دھند چھائے رہنے کا امکان ظاہر کیا گیا ہے، جس سے حدِ نگاہ متاثر ہو سکتی ہے۔
اسلام آباد اور گردونواح میں موسم سرد جبکہ مطلع جزوی ابر آلود رہنے کی پیشگوئی کی گئی ہے۔ خیبرپختونخوا کے بیشتر اضلاع میں موسم سرد اور خشک رہے گا، تاہم چترال، سوات، دیر، کوہستان اور ملحقہ علاقوں میں ہلکی بارش اور ہلکی برفباری ہو سکتی ہے۔ پشاور، مردان، نوشہرہ، چارسدہ، صوابی، بنوں، لکی مروت اور ڈی آئی خان میں صبح اور رات کے اوقات میں ہلکی سے درمیانی دھند کا امکان ہے۔پنجاب کے بیشتر اضلاع میں موسم سرد اور خشک رہنے کی توقع ہے، جبکہ شام اور رات کے وقت خطہ پوٹھوہار میں مطلع جزوی ابر آلود ہو سکتا ہے۔ مری، گلیات اور گردونواح میں موسم شدید سرد رہے گا۔ سیالکوٹ، نارووال، جہلم، گوجرانوالہ، لاہور، فیصل آباد، ساہیوال، ملتان، بہاولپور اور رحیم یار خان سمیت کئی اضلاع میں درمیانی سے شدید دھند چھانے کا خدشہ ظاہر کیا گیا ہے۔
بلوچستان کے بیشتر اضلاع میں موسم سرد اور خشک جبکہ شمالی علاقوں میں شدید سردی اور جزوی ابر آلود موسم متوقع ہے۔ سندھ کے زیادہ تر حصوں میں بھی موسم سرد اور خشک رہے گا، تاہم سکھر، لاڑکانہ، دادو اور جیکب آباد کے گردونواح میں صبح اور رات کے اوقات میں دھند چھا سکتی ہے۔کشمیر میں موسم شدید سرد اور مطلع جزوی ابر آلود جبکہ گلگت بلتستان میں شدید سردی کے ساتھ چند مقامات پر ہلکی بارش اور برفباری کا امکان ہے۔ محکمہ موسمیات نے شہریوں کو دھند اور سرد موسم کے باعث احتیاطی تدابیر اختیار کرنے اور غیر ضروری سفر سے گریز کرنے کا مشورہ دیا ہے۔
مزید پڑھیں :کابل سے غمناک خبر آگئی، بھاری جانی نقصان، جا نئے تفصیلات
