لاہور ( اے بی این نیوز )پنجاب کی سیاست میں ایک اہم پیش رفت سامنے آئی ہے جہاں سابق رکن پنجاب اسمبلی اور سابق رہنما پی ٹی آئی وسیم افضل چن نے اپنے بھائی گلریز افضل چن کے ساتھ پاکستان پیپلز پارٹی میں شمولیت کا فیصلہ کر لیا ہے۔ دونوں رہنماؤں کی پیپلز پارٹی قیادت سے بات چیت آخری مراحل میں داخل ہو چکی ہے، جبکہ پارٹی کی جانب سے مثبت اشارے بھی ملنے کی اطلاعات ہیں۔
وسیم افضل چن 2008 میں جبکہ گلریز افضل چن 2013 میں پنجاب اسمبلی کے رکن منتخب ہوئے تھے۔ دونوں بھائی سابق صوبائی وزیر حاجی افضل چن کے بیٹے اور پیپلز پارٹی کے مرکزی سیکرٹری اطلاعات ندیم افضل چن کے بھائی ہیں، جس کے باعث ان کی واپسی کو پارٹی کے لیے بڑی تقویت قرار دیا جا رہا ہے۔
گلریز افضل چن نے 2013 کے عام انتخابات میں منڈی بہاؤالدین کے حلقہ پی پی 43 سے پاکستان تحریک انصاف کے ٹکٹ پر کامیابی حاصل کی تھی۔ دوسری جانب وسیم افضل چن نے 2023 کا الیکشن پی ٹی آئی کا ٹکٹ نہ ملنے پر آزاد حیثیت سے لڑا، تاہم وہ کامیاب نہ ہو سکے۔
وسیم افضل چن نے رابطہ کرنے پر بتایا کہ دونوں بھائی آئندہ اپنی سیاست ندیم افضل چن کے ساتھ مل کر کریں گے۔ سیاسی مبصرین کے مطابق ان کی پیپلز پارٹی میں ممکنہ شمولیت نہ صرف علاقائی سیاست بلکہ پنجاب کی مجموعی سیاسی بساط پر بھی اثر ڈال سکتی ہے۔
ذرائع کا کہنا ہے کہ وسیم افضل چن اور گلریز افضل چن کی پیپلز پارٹی میں واپسی کو منڈی بہاؤالدین اور گرد و نواح کی سیاست میں ایک بڑی تبدیلی کے طور پر دیکھا جا رہا ہے،
مزید پڑھیں :سعودی شاہی خاندان کیلئے افسوسناک خبر، ملک بھر میں سوگ کی فضا،جا نئے تفصیلات
