ریاض (اے بی این نیوز )سعودی عرب میں شعبان المعظم کا چاند نظر نہیں آیا، سعودی خبر ایجنسی کے مطابق یکم شعبان بروز منگل 20 جنوری 2026 کو ہوگی۔سعودی حکام کا کہنا ہے کہ اتوار اور پیر کی درمیانی شب رویت ممکن نہ ہو سکی، جس کے باعث شعبان کا آغاز ایک روز مؤخر کر دیا گیا ہے۔دوسری جانب غیر سرکاری تنظیم رویتِ ہلال ریسرچ کونسل نے پاکستان میں شعبان کے چاند سے متعلق اپنی پیشگوئی جاری کر دی ہے۔ کونسل کے سیکرٹری جنرل خالد اعجاز مفتی کے مطابق چاند اتوار 18 اور پیر 19 جنوری 2026 کی درمیانی شب پاکستانی وقت کے مطابق رات 12 بج کر 52 منٹ پر پیدا ہوگا۔
ان کا کہنا ہے کہ پیر 19 جنوری کو غروبِ آفتاب کے وقت چاند کی عمر 18 گھنٹوں سے کم ہوگی، جبکہ قابلِ اعتماد رویت کے لیے چاند کی عمر کم از کم 19 گھنٹے ہونا ضروری سمجھی جاتی ہے۔ اسی وجہ سے 19 جنوری کو پاکستان میں شعبان کا چاند نظر آنے کا امکان نہیں۔انہوں نے مزید بتایا کہ غروبِ شمس اور غروبِ قمر کے درمیان فرق بھی مطلوبہ معیار پر پورا نہیں اترے گا۔ گلگت اور مظفر آباد میں یہ فرق 29 منٹ، پشاور، اسلام آباد، لاہور اور چارسدہ میں 30 منٹ، کوئٹہ میں 31 منٹ جبکہ کراچی اور جیوانی میں 33 منٹ رہے گا۔ ماہرین کے مطابق چاند کی واضح رویت کے لیے کم از کم 40 منٹ کا فرق ضروری سمجھا جاتا ہے۔
رویتِ ہلال ریسرچ کونسل کے مطابق 20 جنوری کو چاند نظر آنے کا امکان موجود ہے، جس کے بعد پاکستان میں شعبان 1447 ہجری کا آغاز 21 جنوری بروز بدھ سے متوقع ہے۔واضح رہے کہ چاند نظر آنے یا نہ آنے کا حتمی اعلان مرکزی رویتِ ہلال کمیٹی کی جانب سے کیا جائے گا۔
مزید پڑھیں :تحریک تحفظِ آئین پاکستان عملی طور پر میدان میں آگئی،مطالبات اور نکات جاری کردیئے،جا نئے کیا
