کیلیفورنیا (اے بی این نیوز )گوگل نے جی میل صارفین کے لیے ایک بڑی اور تاریخی اپ ڈیٹ متعارف کرا دی ہے، جس کے تحت اب صارفین پہلی بار اپنا بنیادی جی میل ایڈریس تبدیل کر سکیں گے۔ یہ سہولت جی میل کی 20 سالہ تاریخ میں پہلی مرتبہ دی جا رہی ہے، جسے صارفین کے لیے ایک اہم پیش رفت قرار دیا جا رہا ہے۔
غیر ملکی خبر رساں ایجنسی کے مطابق نئی اپ ڈیٹ کے تحت صارفین کو ہر 12 ماہ میں ایک بار اپنا بنیادی جی میل ایڈریس تبدیل کرنے کی اجازت ہو گی، جبکہ مجموعی طور پر یہ تبدیلی صرف تین مرتبہ کی جا سکے گی۔ گوگل کا کہنا ہے کہ اس اقدام کا مقصد صارفین کو اپنی ڈیجیٹل شناخت پر زیادہ کنٹرول دینا ہے۔
گوگل کی جانب سے متعارف کرائی گئی یہ اپ ڈیٹ جدید اے آئی فیچرز پر مبنی ایک بڑے منصوبے کا حصہ ہے، جس میں جی میل، تصاویر اور دیگر سروسز میں جیمنائی اے آئی کا گہرا انضمام بھی شامل ہے۔
سائبر سیکیورٹی ماہرین کے مطابق یہ نیا فیچر آن لائن تحفظ کے حوالے سے بھی مددگار ثابت ہو سکتا ہے۔ نیا ای میل ایڈریس اختیار کر کے صارفین اسے اہم اکاؤنٹس کے ساتھ منسلک کر سکتے ہیں، جس سے غیر ضروری ای میلز، مارکیٹنگ ڈیٹا بیس اور پرانے ای میل ایڈریس سے منسلک ممکنہ ڈیٹا لیکس کے خدشات کم ہو سکتے ہیں۔
ماہرین کا کہنا ہے کہ پرانے جی میل ایڈریس کو کم استعمال ہونے والی سروسز تک محدود رکھا جا سکتا ہے، جبکہ جی میل فلٹرز کے ذریعے موصول ہونے والے پیغامات کو زیادہ مؤثر انداز میں ترتیب دینا بھی ممکن ہو گا۔اگرچہ گوگل اسپام سے بچاؤ کے لیے مضبوط سسٹمز فراہم کرتا ہے، تاہم ماہرین نے صارفین کو محتاط رہنے کا مشورہ دیا ہے کیونکہ کوئی بھی نظام مکمل طور پر محفوظ نہیں ہوتا۔
الفابیٹ کی ملکیت والی کمپنی گوگل نے تصدیق کی ہے کہ یہ فیچر مرحلہ وار صارفین کو فراہم کیا جا رہا ہے، اس لیے اگر فی الحال کسی اکاؤنٹ میں یہ سہولت نظر نہیں آ رہی تو امکان ہے کہ آنے والے دنوں میں یہ آپشن دستیاب ہو جائے گا۔
