اسلام آباد (اے بی این نیوز)دنیا بھر میں سوشل میڈیا پلیٹ فارم ایکس کی سروسز اچانک ڈاؤن ہو گئیں، جس کے باعث پاکستان سمیت مختلف ممالک میں صارفین کو شدید مشکلات کا سامنا کرنا پڑا۔ خبر ایجنسی کے مطابق سروسز میں تعطل سسٹم کی خرابی کے باعث پیش آیا، جس نے لاکھوں صارفین کو متاثر کیا۔
صارفین کو ٹائم لائن ریفریش نہ ہونے، پوسٹس لوڈ نہ ہونے، لاگ اِن مسائل اور پیغامات بھیجنے میں رکاوٹ جیسی شکایات کا سامنا رہا۔ پاکستان کے علاوہ امریکا، یورپ، مشرق وسطیٰ اور دیگر خطوں سے بھی سروس متاثر ہونے کی اطلاعات سامنے آئیں، جس کے بعد سوشل میڈیا پر ایکس کے ڈاؤن ہونے کا معاملہ ٹاپ ٹرینڈ بن گیا۔
بہت سے صارفین نے متبادل پلیٹ فارمز پر جا کر اپنی پریشانی کا اظہار کیا اور میمز کے ذریعے صورتحال پر تبصرے کیے۔ ڈیجیٹل بزنس، آن لائن صحافت اور فری لانسنگ سے وابستہ افراد کے لیے یہ تعطل خاص طور پر مشکل ثابت ہوا کیونکہ روزمرہ کام کا انحصار بڑی حد تک ایکس پر ہوتا ہے۔
خبر ایجنسی کے مطابق تکنیکی ماہرین سسٹم کی خرابی دور کرنے میں مصروف ہیں، تاہم سروس بحالی کے حوالے سے فوری طور پر کوئی حتمی وقت نہیں بتایا گیا۔ صارفین کو امید ہے کہ ایکس کی سروسز جلد مکمل طور پر بحال ہو جائیں گی تاکہ آن لائن سرگرمیاں دوبارہ معمول پر آ سکیں۔
مزید پڑھیں :اسکولوں کے نئے اوقاتِ کار آگئے،جا نئے تفصیلات
