اسلام آباد(اے بی این نیوز)انسداد دہشت گردی عدالت نے جناح ہاؤس حملہ کیس میں خدیجہ شاہ سمیت 6 ملزمان کو اشتہاری قرار دیتے ہوئے ان کے دائمی وارنٹ گرفتاری جاری کر دیے ۔
عدالت کے مطابق خدیجہ شاہ، فیصل اختر، عادل سعید، سید ارسلان، قاسم منہاس اور عبد اللہ حسن ٹرائل کے لیے بار بار طلبی کے باوجود عدالت میں پیش نہیں ہوئے۔سرکاری وکیل نے عدالت کو بتایا کہ خدیجہ شاہ 9 مئی جلاؤ گھیراؤ کے ایک مقدمے میں سزا کے بعد روپوش ہو چکی ہیں جبکہ دیگر ملزمان بھی گرفتاری کے خوف سے پیش نہیں ہو رہے۔
استغاثہ کے مطابق عدالت کی جانب سے ملزمان کو پیش ہونے کے لیے مہلت دی گئی تھی، تاہم مقررہ وقت تک کوئی بھی ملزم عدالت کے روبرو پیش نہ ہوا۔ یاد رہے کہ 20 ستمبر 2025 کو خدیجہ شاہ نے جلاؤ گھیراؤ کیس میں سنائی گئی سزا کو لاہور ہائیکورٹ میں چیلنج کیا تھا، جہاں انہوں نے وکیل سمیر کھوسہ ایڈووکیٹ کے ذریعے اپیل دائر کی جس میں مؤقف اختیار کیا تھا کہ خدیجہ شاہ کا مقدمے سے کوئی تعلق نہیں اور انہیں سیاسی بنیادوں پر مقدمے میں نامزد کیا گیا ہے۔
واضح رہے کہ لاہور کی انسداد دہشتگردی عدالت نے 9 مئی کے دیگر مقدمات میں بانی پی ٹی آئی کی بہنوں علیمہ خان اور عظمیٰ خان کی ایک روزہ حاضری معافی منظور کرتے ہوئے دیگر ملزمان کی ضمانتوں میں 31 اکتوبر تک توسیع کی تھی۔
مزید پڑھیں۔معروف یوٹیوبر رجب بٹ کے سوشل میڈیا اکاؤنٹس غیر فعال
