اسلام آباد(اے بی این نیوز) بینظیر انکم سپورٹ پروگرام (بی آئی ایس پی) نے مستحق اور رجسٹرڈ خاندانوں کو اب بالکل مفت موبائل سم فراہم کی جائے گی۔
اس اقدام کا مقصد ادائیگیوں کے نظام کو مزید محفوظ، شفاف اور براہِ راست بنانا ہے، تاکہ مستحق افراد تک درست معلومات بروقت پہنچ سکیں۔
بی آئی ایس پی ترجمان کے مطابق یہ سہولت نئے متعارف کردہ سوشل پروٹیکشن والٹ کے تحت فراہم کی جا رہی ہے۔ مفت سم کے ذریعے اہل بینیفیشریز کو 8171 سے متعلق تمام پیغامات، ادائیگیوں کی معلومات اور دیگر اہم ہدایات براہِ راست موصول ہوں گی، جس سے فراڈ اور غلط معلومات کے امکانات کم ہو جائیں گے۔
ترجمان نے بتایا کہ مفت سم حاصل کرنے کیلئے مستحق افراد کو اپنا اصل قومی شناختی کارڈ اور موبائل فون ساتھ لے کر قریبی بی آئی ایس پی کیمپ سائٹ یا دفتر جانا ہوگا۔ وہاں اسکریننگ کاؤنٹر پر اہلیت کی تصدیق کی جائے گی، اہل قرار دیے جانے پر ٹوکن دیا جائے گا، جس کے بعد سم اجرا کاؤنٹر پر بائیومیٹرک تصدیق مکمل کی جائے گی۔ بائیومیٹرک عمل مکمل ہونے کے فوراً بعد سم فعال کر دی جائے گی۔
بی آئی ایس پی کی جانب سے ہدایت کی گئی ہے کہ فراہم کی گئی سم صرف اپنے استعمال میں رکھیں اور کسی دوسرے فرد کے حوالے نہ کریں۔ سم کو ہر وقت آن رکھنا ضروری ہوگا تاکہ بی آئی ایس پی کی جانب سے بھیجے گئے تمام اہم پیغامات اور ادائیگیوں سے متعلق معلومات بروقت موصول ہوتی رہیں۔
اس موقع پر چیئرپرسن بی آئی ایس پی سینیٹر روبینہ خالد نے بتایا کہ سوشل پروٹیکشن والٹ کے ذریعے رجسٹرڈ شہریوں کو ادائیگیوں کا نیا اور جدید نظام فراہم کیا جا رہا ہے، جس سے شفافیت اور سہولت میں نمایاں اضافہ ہوگا۔
ان کے مطابق اس نظام کے تحت رجسٹرڈ خواتین میں مفت سم کارڈز کی تقسیم شروع کر دی گئی ہے، خواتین اپنے اصل شناختی کارڈ اور موبائل فون کے ساتھ قریبی بی آئی ایس پی دفتر یا مقررہ کیمپ میں جا کر یہ سہولت حاصل کر سکتی ہیں۔
مزید پڑھیں۔شامی فوج اور باغی ایس ڈی ایف کے درمیان جھڑپیں میں شدت، حلب کے متعدد علاقوں میں کرفیو نافذ
