اسلام آباد (  اے بی این نیوز        ) وفاقی حکومت نے ملک بھر کے صارفین کے لیے بجلی کا بنیادی ٹیرف موجودہ سطح پر برقرار رکھنے کا فیصلہ کیا ہے۔ نیشنل الیکٹرک پاور ریگولیٹری اتھارٹی کے مطابق اس حوالے سے سفارشات وفاقی حکومت کو ارسال کر دی گئی ہیں، جن پر حتمی منظوری دی جائے گی۔نیپرا کی تجویز کے مطابق گھریلو صارفین کے لیے زیادہ سے زیادہ بجلی کا بنیادی ٹیرف 47 روپے 69 پیسے فی یونٹ برقرار رکھا جائے گا۔ پروٹیکٹڈ گھریلو صارفین کے لیے ایک سے 100 یونٹ تک بجلی کا ٹیرف 10 روپے 54 پیسے فی یونٹ جبکہ 101 سے 200 یونٹ تک 13 روپے 01 پیسے فی یونٹ تجویز کیا گیا ہے۔

نان پروٹیکٹڈ گھریلو صارفین کے لیے ایک سے 100 یونٹ تک بجلی کا ٹیرف 22 روپے 44 پیسے اور 101 سے 200 یونٹ تک 28 روپے 91 پیسے فی یونٹ برقرار رکھنے کی سفارش کی گئی ہے۔اسی طرح 201 سے 300 یونٹ استعمال کرنے والوں کے لیے فی یونٹ ٹیرف 33 روپے 10 پیسے، 301 سے 400 یونٹ کے لیے 37 روپے 99 پیسے اور 401 سے 500 یونٹ کے لیے 40 روپے 22 پیسے رکھنے کی تجویز دی گئی ہے۔

نیپرا کے مطابق 501 سے 600 یونٹ تک بجلی استعمال کرنے والوں کے لیے ٹیرف 41 روپے 62 پیسے جبکہ 601 سے 700 یونٹ تک 42 روپے 76 پیسے فی یونٹ برقرار رہنے کا امکان ہے۔ 700 یونٹ سے زائد بجلی استعمال کرنے والے گھریلو صارفین کے لیے بنیادی ٹیرف 47 روپے 69 پیسے فی یونٹ تجویز کیا گیا ہے، تاہم ٹیکسز اور دیگر سرچارجز شامل ہونے کے بعد اصل قیمت میں اضافہ ہو سکتا ہے۔لائف لائن گھریلو صارفین کے لیے ماہانہ 50 یونٹ تک بجلی کا ٹیرف 3 روپے 95 پیسے اور 51 سے 100 یونٹ تک 7 روپے 74 پیسے فی یونٹ برقرار رکھنے کی سفارش بھی شامل ہے۔نیپرا کا کہنا ہے کہ یکساں ٹیرف سے متعلق درخواست پر فیصلہ وفاقی حکومت کو بھیج دیا گیا ہے، جس کے بعد اس پر عملدرآمد کا حتمی اعلان کیا جائے گا۔

مزید پڑھیں :تحریک تحفظ آئین پاکستان جیسے فورمز عمران خان کی عدم موجودگی میں متناز عہ نظر آتے ہیں،محمدزبیر