اسلام آباد (اے بی این نیوز )جاپانی کار ساز کمپنی ہونڈا نے پاکستان میں اپنی مقبول سیڈان ہونڈا سوک کی اپڈیٹڈ رینج کے لیے محدود مدت کی تعارفی قیمتوں کا اعلان کر دیا ہے۔ یہ اعلان نئی بکنگز کھولنے کے چند روز بعد سامنے آیا ہے، جس کے بعد کار شوقین افراد میں خاصی دلچسپی دیکھنے میں آ رہی ہے۔پرو پاکستانی کے مطابق ہونڈا کی جانب سے سوک کے مختلف ویریئنٹس کی نئی قیمتیں مقرر کی گئی ہیں۔ کمپنی کے مطابق ہونڈا سوک کی ابتدائی تعارفی قیمت 84 لاکھ 99 ہزار روپے رکھی گئی ہے، جبکہ سوک اورئیل کی قیمت 88 لاکھ 34 ہزار روپے مقرر کی گئی ہے۔ اسی طرح ٹاپ آف دی لائن ویریئنٹ ہونڈا سوک آر ایس کی قیمت 1 کروڑ 1 لاکھ روپے طے کی گئی ہے۔
ہونڈا کا کہنا ہے کہ یہ قیمتیں صرف تعارفی بنیادوں پر متعارف کرائی گئی ہیں اور محدود مدت کے لیے دستیاب ہوں گی، جن کا اطلاق کمپنی کی معیاری شرائط و ضوابط کے تحت ہوگا۔
یاد رہے کہ ہونڈا نے اس سے قبل اپڈیٹڈ سوک رینج کی بکنگز کا آغاز کیا تھا، جس کے ساتھ بکنگ اماؤنٹس میں بھی نظرثانی کی گئی۔ کمپنی کے مطابق سوک کے لیے بکنگ رقم 13 لاکھ روپے، سوک اورئیل کے لیے 14 لاکھ روپے جبکہ سوک آر ایس کے لیے 16 لاکھ روپے مقرر کی گئی ہے۔
ہونڈا نے حال ہی میں اس بات کی بھی تصدیق کی ہے کہ نئی سوک لائن اپ میں معمولی فیس لفٹ کے ساتھ ساتھ تمام ویریئنٹس میں نئے اور جدید فیچرز شامل کیے گئے ہیں، جن کا مقصد صارفین کو بہتر، آرام دہ اور جدید ڈرائیونگ تجربہ فراہم کرنا ہے۔ تاہم فیچرز کی مکمل تفصیلات تاحال سامنے نہیں لائی گئیں۔کمپنی کی جانب سے تعارفی قیمتوں کی مدت کے خاتمے کی کوئی حتمی تاریخ بھی جاری نہیں کی گئی۔
مزید پڑھیں :افغان اور بھارتی پروپیگنڈا مشینری کا گٹھ جوڑ خطے میں عدم استحکام پھیلانے میں سرگرم
