لاہور(اے بی این نیوز)پٹرولیم مصنوعات کی قیمتوں میں کمی کے بعد محکمہ ٹرانسپورٹ پنجاب نے لاہور سے مختلف شہروں کو جانے والی پبلک ٹرانسپورٹ بسوں کے کرایوں میں نمایاں کمی کا اعلان کر دیا ہے۔
محکمہ ٹرانسپورٹ کے مطابق نئی پالیسی کے تحت بس کرایوں میں 60 روپے سے 200 روپے تک کمی کی گئی ہے، جس کا مقصد شہریوں کے لیے بین الاضلاعی سفر کو مزید آسان اور کم خرچ بنانا ہے۔
نئی کرایہ فہرست کے مطابق لاہور سے اسلام آباد کا کرایہ 1910 روپے سے کم کرکے 1850 روپے، مری کا 2370 سے 2290 روپے، پشاور کا 2610 سے 2530 روپے اور مانسہرہ کا کرایہ 2500 سے کم کرکے 2420 روپے مقرر کر دیا گیا ہے۔
اسی طرح ایبٹ آباد کا کرایہ 2310 سے گھٹا کر 2240 روپے، فیصل آباد کا 1010 سے 980 روپے، صادق آباد کا 2510 سے 2430 روپے، کراچی کا 5800 سے 5620 روپے، سکھر کا 3510 سے 3400 روپے جبکہ ملتان کا کرایہ 1700 سے کم کرکے 1650 روپے کر دیا گیا ہے۔
محکمہ ٹرانسپورٹ کا کہنا ہے کہ اس اقدام کا مقصد عوام کو پٹرولیم مصنوعات کی قیمتوں میں کمی کا براہِ راست فائدہ پہنچانا اور سفری اخراجات میں کمی لانا ہے۔
واضح رہے کہ نئے سال کے آغاز پر حکومت نے عوام کو ریلیف دیتے ہوئے پٹرولیم مصنوعات کی قیمتوں میں نمایاں کمی کا اعلان کیا تھا۔ وزارت خزانہ کی جانب سے جاری نوٹیفکیشن کے مطابق پٹرول کی قیمت میں 10 روپے 28 پیسے جبکہ ہائی اسپیڈ ڈیزل کی قیمت میں 8 روپے 57 پیسے کمی کی گئی ہے۔
مزید پڑھیں۔چترال: 68 ہزار امریکی ڈالرز میں کشمیری مارخور کا شکار
