اسلام آباد( اے بی این نیوز) وزیراعظم محمد شہباز شریف سے پاکستان میں تعینات سعودی عرب کے سفیر نواف بن سعید احمد المالکی نے وزیراعظم ہاؤس میں ملاقات کی، جس میں دوطرفہ تعلقات کے ساتھ حالیہ علاقائی اور عالمی صورتحال پر تفصیلی گفتگو کی گئی۔
ملاقات کے دوران وزیراعظم نے خادمِ حرمین شریفین شاہ سلمان بن عبدالعزیز آل سعود اور سعودی عرب کے ولی عہد و وزیر اعظم شہزادہ محمد بن سلمان بن عبدالعزیز آل سعود کے لیے نیک تمناؤں اور احترام کا اظہار کیا۔ انہوں نے پاکستان اور سعودی عرب کے درمیان دیرینہ برادرانہ تعلقات پر اطمینان کا اظہار کرتے ہوئے ان روابط کو مزید مضبوط بنانے کے عزم کا اعادہ کیا۔
وزیراعظم شہباز شریف نے ولی عہد شہزادہ محمد بن سلمان کی جانب سے پاکستان کی مسلسل حمایت پر شکریہ ادا کرتے ہوئے کہا کہ اس تعاون سے دونوں ممالک کے تعلقات نئی بلندیوں تک پہنچے ہیں۔ انہوں نے رواں سال کے دوران ولی عہد کے ساتھ ہونے والی ملاقاتوں کا حوالہ دیتے ہوئے انہیں انتہائی مثبت اور نتیجہ خیز قرار دیا، جنہوں نے پاک سعودی تعلقات کو مزید وسعت دی۔
وزیراعظم نے مشکل اوقات میں سعودی عرب کی جانب سے پاکستان کی معاونت اور خطے میں امن و استحکام کے فروغ کے لیے مملکت کے تعمیری کردار کو بھی سراہا۔ ملاقات میں موجودہ علاقائی اور عالمی پیش رفت پر تبادلہ خیال کیا گیا، جہاں وزیراعظم نے امن کے قیام کے لیے مذاکرات اور سفارتکاری کی اہمیت پر زور دیا۔
سعودی سفیر نواف بن سعید احمد المالکی نے شاہ سلمان بن عبدالعزیز اور ولی عہد شہزادہ محمد بن سلمان کی جانب سے وزیراعظم کے لیے نیک خواہشات اور تہنیتی پیغام پہنچایا۔ انہوں نے باہمی دلچسپی کے تمام شعبوں میں پاکستان کے ساتھ تعاون مزید بڑھانے کے عزم کا بھی اعادہ کیا۔
مزید پڑھیں :سال نو کا تحفہ،پٹرولیم مصنوعات تاریخی سستی،جا نئے نئی قیمت،فی لٹر کتنا کم ہوا
