اسلام آباد(اے بی این نیوز)وفاقی وزیر خزانہ اور ریونیو سینیٹر محمد اسحاق ڈار نے اسلام آباد میں ترک سفارتخانے کا دورہ کیا اور ترکی میں آنے والے مہلک ترین زلزلے میں ہونے والے جانی و مالی نقصانات پر تعزیتی کتاب میں دلی تعزیت اور ہمدردی کا اظہار کیا۔ وزیر خزانہ نے کہا کہ پاکستان کی حکومت اور عوام تباہ کن زلزلے میں قیمتی جانوں اور املاک کے ضیاع پر غمزدہ ہیں اور مشکل وقت میں ترک عوام کے ساتھ کھڑے ہیں۔وزیر خزانہ نے مزید کہا کہ پاکستان اور ترکی کے درمیان باہمی اعتماد، ہم آہنگی اور بھائی چارے پر مبنی دیرینہ تعلقات ہیں۔ دونوں ممالک بحران کی گھڑی میں ایک دوسرے کے ساتھ کھڑے رہے ہیں۔ انہوں نے اس عزم کا اظہار کیا کہ حکومت اور پاکستان کے عوام آزمائش کی اس گھڑی میں اپنے ترک بھائیوں اور بہنوں کے ساتھ کھڑے رہیں گے۔
