اسلام آباد ( اے بی این نیوز )سابق مشیرِ احتساب شہزاد اکبر کی پاکستان واپسی سے متعلق ایک اہم پیش رفت سامنے آئی ہے، جہاں پاکستانی حکومت نے برطانوی حکومت کو مطلوبہ دستاویزات باقاعدہ طور پر ارسال کر دی ہیں۔
ذرائع کے مطابق برطانوی حکام کو بھیجی گئی دستاویزات میں شہزاد اکبر کے خلاف درج مقدمات اور پاکستان میں جاری عدالتی کارروائیوں کی مکمل تفصیلات شامل ہیں۔ ان دستاویزات میں بتایا گیا ہے کہ شہزاد اکبر کے خلاف وفاقی پولیس اسلام آباد میں مجموعی طور پر تین مقدمات درج ہیں، جن میں سے دو تھانہ سیکرٹریٹ اور ایک تھانہ کوہسار میں درج کیا گیا ہے۔
ذرائع کا کہنا ہے کہ نیشنل سائبر کرائم انویسٹی گیشن ایجنسی، وفاقی تحقیقاتی ادارے اور قومی احتساب بیورو میں درج کیسز کی تفصیلات بھی برطانوی حکومت کو فراہم کر دی گئی ہیں، تاکہ قانونی معاونت کے عمل کو آگے بڑھایا جا سکے۔
دستاویزات میں یہ بھی درج ہے کہ بعض مقدمات میں مقامی عدالتوں نے شہزاد اکبر کو اشتہاری قرار دیا ہے، جبکہ چند کیسز میں سزا سے متعلق عدالتی فیصلوں کی تفصیلات بھی شامل کی گئی ہیں۔ حکومتی ذرائع کے مطابق یہ تمام معلومات قانونی تقاضوں کے مطابق تیار کر کے برطانوی حکام کو بھجوائی گئی ہیں۔
ذرائع کے مطابق وفاقی حکومت نے یہ معاملہ کیس ٹو کیس بنیاد پر اٹھایا ہے اور ابتدائی مرحلے میں شہزاد اکبر اور عادل راجہ سے متعلق کیسز برطانیہ کو ارسال کیے گئے ہیں۔ حکومتی سطح پر یہ بھی بتایا جا رہا ہے کہ آئندہ مرحلے میں دیگر مطلوب افراد کے کیسز بھی اسی طریقہ کار کے تحت متعلقہ ممالک کو بھجوائے جانے کا امکان ہے۔
مزید پڑھیں :عمران خان کو وزیر اعظم بنائیں گے نہ ہی بلاول بھٹو کو ،مولانا فضل الرحمان
