اسلام آباد (اے بی این نیوز )نیشنل ڈیٹا بیس اینڈ رجسٹریشن اتھارٹی نے شہریوں کے لیے قومی شناختی کارڈ سے متعلق نئی ہدایات جاری کرتے ہوئے بروقت کارڈ وصول کرنے پر زور دیا ہے۔ نادرا کا کہنا ہے کہ مقررہ مدت میں شناختی کارڈ وصول نہ کرنے کی صورت میں شہریوں کو مختلف قانونی اور انتظامی مسائل کا سامنا کرنا پڑ سکتا ہے۔نادرا کی جانب سے جاری بیان میں خبردار کیا گیا ہے کہ ایک بار شناختی کارڈ کی درخواست جمع کروانے کے بعد شہریوں کے لیے لازم ہے کہ وہ مقررہ ڈیڈ لائن سے پہلے اپنا کمپیوٹرائزڈ قومی شناختی کارڈ حاصل کریں۔ اگر نامزد ترسیل کی تاریخ کے تین ماہ کے اندر کارڈ وصول نہ کیا گیا تو اسے مستقل طور پر مسترد کر دیا جائے گا۔
اتھارٹی کے مطابق شناختی کارڈ مسترد ہونے کی صورت میں شہریوں کو دوبارہ نئی درخواست جمع کروانا ہو گی اور متعلقہ فیس بھی دوبارہ ادا کرنا پڑے گی، جس سے اضافی وقت اور اخراجات کا سامنا ہو سکتا ہے۔نادرا نے شہریوں کو سہولت فراہم کرنے کے لیے پاکستان آئی ڈی موبائل ایپ اور ہوم ڈلیوری سروس استعمال کرنے کی ہدایت بھی کی ہے۔ ان سہولیات کے ذریعے شناختی کارڈ براہ راست گھر پر حاصل کیا جا سکتا ہے اور نادرا دفاتر کے غیر ضروری چکروں سے بچا جا سکتا ہے۔
اسی کے ساتھ نادرا نے قومی شناختی کارڈ کے حصول کے لیے نئی پروسیسنگ فیس اور ٹائم لائنز بھی جاری کر دی ہیں۔ اعلامیے کے مطابق عام سروس بالکل مفت ہے اور اس کے تحت شناختی کارڈ 15 روز میں جاری کیا جاتا ہے۔ارجنٹ سروس کے تحت درخواست دینے والوں کو 12 دن میں کارڈ ملتا ہے، جس کی فیس 1150 روپے مقرر کی گئی ہے۔ جبکہ ایگزیکٹو سروس کا انتخاب کرنے والے شہری 2150 روپے فیس ادا کر کے صرف 6 دن میں شناختی کارڈ حاصل کر سکتے ہیں۔
مزید پڑھیں :علیمہ خان اڈیالہ جیل کے باہر کارکنوں کے ہمراہ دھرنا، ڈٹ گئیں،گرم کپڑے لائے ہیں واپس نہیں جا ئیں گے
